आष्टीकरांना दुहेरी दणका, नांदेडची निवडणूक हरताच ठाकरे गटाकडून झाली हकालपट्टी | महाराष्ट्र बातम्या

अशोक चव्हाणांची राजकीय खेळी यशस्वी

सुरुवातीला नांदेडची ही निवडणूक अतिशय चुरशीची आणि अटीतटीची होईल असा राजकीय अंदाज वर्तवला जात होता. मात्र, माजी मुख्यमंत्री आणि विद्यमान खासदार अशोकराव चव्हाण यांनी आपले राजकीय कसब पणाला लावत महायुतीतील सर्व घटक पक्षांची भक्कम मोट बांधली. केवळ महायुतीच नाही, तर मराठवाडा जनता विकास पार्टीच्या नगरसेवकांनाही त्यांनी आपल्या बाजूने वळवण्यात मोठे यश मिळवले.

मविआमध्ये फूट आणि काँग्रेसची पडझड

या निवडणुकीत महाविकास आघाडीला मोठा धक्का बसला आहे. काँग्रेसने ऐनवेळी आपला अधिकृत उमेदवार मागे घेऊन अपक्ष उमेदवार कृष्णा आष्टीकर यांना पाठिंबा जाहीर केला होता. त्यातच खासदार नागेश पाटील आष्टीकर यांनी उद्धव बाळासाहेब ठाकरे गटाची साथ सोडून मुख्यमंत्री एकनाथ शिंदे यांच्या शिवसेनेत प्रवेश करण्याचा निर्णय घेतल्याने मविआला मोठे खिंडार पडले.

काँग्रेसकडे स्वतःची ९२ आणि ठाकरे गटाकडे १९ मते असतानाही त्यांच्या पुरस्कृत उमेदवाराला केवळ ८४ मतेच मिळू शकली. काँग्रेसची तब्बल २७ मते फुटल्याचे आणि ती मते थेट भाजपच्या पारड्यात गेल्याचं स्पष्ट झालं आहे. नांदेड विधान परिषदेच्या इतिहासात पहिल्यांदाच एवढ्या मोठ्या संख्येने मते बाद झाली आहेत. ही मते नेमकी कोणत्या पक्षाची होती, यावरून आता राजकीय वर्तुळात विविध तर्कवितर्क लढवले जात आहेत.