क्रिकेट विश्वात सध्या एका खेळाडूची सर्वाधिक चर्चा आहे तो म्हणजे वैभव सूर्यवंशी. वयाच्या अवघ्या 15 व्या वर्षी या मुलाने कमाल केली आहे. टॅलेंट वैभव सूर्यवंशीमध्ये ठासून भरलय. आपल्या प्रदर्शनाच्या बळावर त्याने भारताच्या सिनियर संघात स्थान मिळवलय. बीसीसीआयच्या निवड समितीला त्याने दखल घ्यायला भाग पाडली. लवकरच आर्यलंड किंवा इंग्लंड दौऱ्यात वैभव सूर्यवंशी सिनियर टीमकडून खेळताना दिसू शकतो. पण आता सूर्यवंशी कुटुंबातील अजून एकाची चर्चा सुरु झाली आहे. पण हा वैभव सूर्यवंशी नाहीय. त्याचा लहान भाऊ आशिर्वाद आहे. वैभव आंतरराष्ट्रीय स्तरावर नाम कमावतोच आहे. बिहार समस्तीपूरमध्ये स्थानिक सराव सामन्यात वैभवचा लहान भाऊ आशिर्वादने शानदार शतक झळकावलं.
त्यामुळे तो सर्वत्र चर्चेचा विषय बनला आहे. आशिर्वादने 87 चेंडूत 103 धावा फटकावल्या. ताजपूर क्रिकेट अकादमीकडून तो खेळत होता. आशिर्वादच्या इनिंगमध्ये 20 चौकार आणि एक सिक्स होता. 118.39 च्या स्ट्राइक रेटने त्याने फलंदाजी केली. आशिर्वादच्या या शतकाबद्दल वैभव सूर्यवंशीने सोशल मीडियावरुन त्याचं कौतुक केलं आहे. आयपीएल 2026 चा सीजन वैभव सूर्यवंशीने गाजवला. त्याने 16 सामन्यात 776 धावा ठोकल्या. यंदाच्या सीजनमधला वैभव टॉप स्कोरर आहे. त्याला ऑरेंज कॅप मिळाली. साई सुदर्शन, शुबमन गिल आणि विराट कोहली सारख्या प्लेयर्सना त्याने मागे टाकलं.
फटाके फोडले
6 जूनला वैभवची टीम इंडियात निवड झाली. त्यानंतर बिहार समस्तीपूर जिल्ह्यातील ताजपूर या गावात जोरदार सेलीब्रेशन झालं. शेजारी, नातेवाईक आणि ओळखी पाळखीचे लोक शुभेच्छा देण्यासाठी वैभवच्या घरी येत होते. लाडू वाटण्यात आले. फटाके फोडले.
काहीतरी चांगलं होईल म्हणून वाट पाहत होतो
“आम्ही घरीच होतो. काहीतरी चांगलं होईल म्हणून वाट पाहत होतो. जेव्हा घोषणा झाली तेव्हा खूप आनंद झाला. आमचं संपूर्ण कुटुंब, समाजातील लोक, गावकरी आमच्या घरी शुभेच्छा देण्यासाठी आले. मिठाई आणि लाडू वाटले. फटाके फोडले. आम्ही खूप, खूप आनंदात आहोत” असं वैभवचे वडिल संजीव सूर्यवंशी म्हणाले.
