Last Updated:
Lionel Messi: फिफा विश्वचषक 2026 च्या बाद फेरीपूर्वी मियामीत अर्जेंटिनाच्या संघाची कडक सुरक्षा तपासणी करण्यात आली ज्यामध्ये लिओनेल मेसी यांनाही कोणतीही विशेष सवलत देण्यात आली नाही.
मियामी : फिफा विश्वचषक 2026 मध्ये गतविजेता अर्जेंटिना संघाने आतापर्यंत शानदार कामगिरी करत विजयी घोडदौड कायम ठेवली आहे. गट फेरीतील तिन्ही सामने जिंकत अर्जेंटिनाने बाद फेरीत (राउंड ऑफ ३२) प्रवेश केला असून आता त्यांचा सामना केप व्हर्डेविरुद्ध होणार आहे. या सामन्यापूर्वी अर्जेंटिनाचा संघ फ्लोरिडा राज्यातील मियामी गार्डन्स येथे पोहोचला असता सर्व खेळाडूंप्रमाणेच स्टार फुटबॉलपटू लिओनेल मेसी यांचीही कडक सुरक्षा तपासणी करण्यात आली. या तपासणीचा व्हिडिओ सोशल मीडियावर मोठ्या प्रमाणात व्हायरल होत आहे.
अर्जेंटिनाने गट फेरीत ऑस्ट्रिया, अल्जेरिया आणि जॉर्डन या तिन्ही संघांचा पराभव करत बाद फेरीतील आपले स्थान निश्चित केले आहे. आता राउंड ऑफ 32 मध्ये अर्जेंटिनासमोर केप व्हर्डेचे आव्हान असणार आहे. हा सामना फ्लोरिडातील मियामी गार्डन्स येथे खेळवला जाणार आहे.
अर्जेंटिनाचा संघ मियामी येथे पोहोचल्यानंतर सुरक्षा यंत्रणांनी प्रत्येक खेळाडूची नियमित तपासणी केली. यामध्ये लिओनेल मेसी यांनाही कोणतीही विशेष सवलत देण्यात आली नाही.
सुरक्षा अधिकाऱ्यांनी हँडहेल्ड मेटल डिटेक्टरच्या साहाय्याने मेसी यांची तपासणी केली. त्यानंतर इतर सर्व खेळाडूंप्रमाणेच त्यांची अंगझडती घेण्यात आली. एवढेच नव्हे तर त्यांच्या बुटांचीही स्वतंत्रपणे स्कॅनिंग करण्यात आली. तसेच त्यांच्या बॅगेचीही सखोल तपासणी करण्यात आली.
विशेष म्हणजे लिओनेल मेसी हे अमेरिकेतील इंटर मियामी या क्लबकडून खेळत असल्याने मियामी शहर त्यांच्यासाठी परिचित आहे. तरीही सुरक्षा यंत्रणांनी कोणतीही तडजोड न करता सर्व नियमांनुसार त्यांची तपासणी केली.
कडक सुरक्षा तपासणी सुरू असतानाही लिओनेल मेसी अतिशय शांत आणि निवांत दिसत होते. ते आपल्या सहकारी खेळाडूंसोबत हसत-खेळत गप्पा मारताना दिसले. या संपूर्ण तपासणीचा व्हिडिओ सोशल मीडियावर मोठ्या प्रमाणात व्हायरल झाला असून, चाहत्यांकडून त्यावर विविध प्रतिक्रिया व्यक्त केल्या जात आहेत.
🚨🚨C’EST DU JAMAIS VU!!!
Messi, le meilleur joueur de l’histoire à été passé au détecteur de métaux lors de l’arrivée de la délégation argentine à Miami… et ce n’est pas ça le plus choquant.
Le plus choquant c’est ca tête en train de rire 😭😭 pic.twitter.com/Gu4RMjtaxU
— FAN INTER-MESSI (@FANFOOTMESSI) July 2, 2026
अर्जेंटिना हा फिफा विश्वचषकाचा विद्यमान विजेता आहे. 2022 मध्ये कतारमध्ये झालेल्या अंतिम सामन्यात अर्जेंटिनाने फ्रान्सचा पराभव करून विश्वविजेतेपद पटकावले होते. यंदाच्या स्पर्धेतही अर्जेंटिनाने प्रभावी सुरुवात केली आहे. गट फेरीतील तिन्ही सामने जिंकत त्यांनी बाद फेरी गाठली असून आता 4 जुलै रोजी राउंड ऑफ 32 मध्ये केप व्हर्डेविरुद्ध त्यांचा सामना होणार आहे. भारतीय वेळेनुसार हा सामना पहाटे 3.30 वाजता सुरू होईल.
लिओनेल मेसी यांची या स्पर्धेतील कामगिरीही उत्कृष्ट राहिली आहे. त्यांनी आतापर्यंत तीन सामन्यांत सहा गोल झळकावले असून गोल्डन बूट पुरस्काराच्या शर्यतीत ते संयुक्तपणे अव्वल स्थानावर आहेत. त्यांच्या या दमदार फॉर्ममुळे विश्वचषक जिंकण्यासाठी अर्जेंटिना पुन्हा एकदा प्रबळ दावेदार मानला जात आहे.
Mumbai,Maharashtra
Jul 02, 2026 11:37 PM IST
Lionel Messi: अमेरिकेत मेसीच्या बुटांचीही स्कॅनिंग, बॅग उघडून प्रत्येक गोष्ट तपासली; विमानतळावरील व्हिडिओ व्हायरल
