Gold Silver Rate नवी दिल्ली : सोने आणि चांदीच्या दरात गेल्या 5 दिवसांमध्ये मोठी घसरण झाली आहे. 24 कॅरेट सोन्याचे दर पाच दिवसात 150169 रुपयांवरुन कमी होऊन 144941 रुपयांवर आले आहेत. म्हणजेच सोन्याचा दर 5228 रुपयांनी घटला आहे. चांदीच्या दरात देखील या आठवड्यात मोठी घसरण झाली आहे. चांदीचा दर 2.51 लाख रुपयांवरुन कमी होऊन 2 लाख 30 हजार 982 रुपयांवर आला आहे. म्हणजेच एक किलो चांदीच्या दरात 20029 रुपयांची घसरण झाली आहे.
सोने दरात घसरण कशामुळं?
आंतरराष्ट्रीय बाजारात सोने आणि चांदीचा दर गेल्या एक आठवड्यात 1 टक्क्यांनी कमी झाला आहे. याचा परिणाम देशातंर्गत बाजारात देखील पाहायला मिळत आहे. याशिवाय डॉलर निर्देशांक सातत्यानं मजबूत होत आहे. शुक्रवारी डॉलर निर्देशांक 1 वर्षाच्या उच्चांकावर पोहोचला होता. जेव्हा जेव्हा डॉलर निर्देशांकात अशी स्थिती निर्माण होते तेव्हा सोने आणि चांदीच्या दरात घसरण होते. लोक सोने आणि चांदीतील गुंतवणुकीऐवजी डॉलरमधील गुंतवणुकीला प्राधान्य देतात.
इंडिया बुलियन्स ज्वेलर्स असोसिएशनच्या रिपोर्टनुसार शुक्रवारी 24 कॅरेट सोन्याचा दर 144941 रुपये प्रति 10 ग्रॅमवर होता. 23 कॅरेट सोन्याचा दर 144361 रुपये, 22 कॅरेट सोन्याचा दर 132766 रुपये, 18 कॅरेट सोन्याचा दर 108706 रुपये आणि 14 कॅरेट सोन्याचा दर 84791 रुपये प्रति 10 ग्रॅमच्या स्तरावर होता. चांदीचा दर शुक्रवारी 230982 रुपये प्रति किलो होता. इंडिया बुलियन्स ज्वेलर्स असोसिएशनकडून शनिवार आणि रविवारी सोने आणि चांदीचे दर जाहीर केले जात नाहीत.
सोने आणि चांदीमध्ये गुंतवणूक करणाऱ्यांना गेल्या वर्षात चांगला परतावा मिळाला आहे. डिसेंबर 2024 मध्ये 75 हजारांवर असलेले सोन्याचे दर 2026 च्या जानेवारी महिन्यात 1 लाख 75 हजार रुपयांपर्यंत पोहोचले होते. तर, चांदीच्यादरानं देखील डिसेंबर 2024 पासून 96 हजारांवरुन जानेवारी 2026 पर्यंत चार लाखांचा टप्पा गाठला होता. त्या तुलनेत सध्या सोने आणि चांदीच्या दरात घसरण झाली आहे.
अमेरिका आणि इराण यांच्यातील युद्धामुळं निर्माण झालेली स्थिती, परकीय चलनाचा साठा याचा विचार करता पंतप्रधान नरेंद्र मोदी यांनी या वर्षभरात सोने आणि चांदी खरेदी करु नये असं आवाहन केलं होतं. यानंतर केंद्र सरकारनं सोने आयातवरील शुल्क देखील वाढवलं होतं. यामुळं सोने आयातीवर परिणाम होत, आयातीमध्ये घट झाली आहे.
दरम्यान, इंडिया बुलियन्स ज्वेलर्स असोसिएशनकडून दिवसातून दोन वेळा दर जाहीर केले जातात. दुपारी 12 वाजता आणि सायंकाळी 5 वाजता सोमवार ते शुक्रवार या पाच दिवसांमध्ये दर जाहीर केले जातात. सोने आणि चांदीचे हे दर जीएसटीशिवायचे असतात.
Ladki Bahin Yojana Beneficiary List Check : लाडकी बहीण योजनेतून तुमचं नाव हटवलं तर नाही ना? चेक करा!
