टीम इंडियाने शुबमन गिल याच्या नेतृत्वात अफगाणिस्तानला एकमेव कसोटी सामन्यासह वनडे सीरिजमध्ये पराभूत केलं. त्यानंतर आता टीम इंडिया आयर्लंड आणि इंग्लंड विरुद्ध टी 20I मालिका खेळणार आहे. तर टीम इंडियाच्या इंग्लंड दौऱ्याची सांगता एकदिवसीय मालिकेने होणार आहे. इंग्लंड विरूद्धच्या एकदिवसीय मालिकेसाठी रविवारी 21 जून रोजी बीसीसीआयने भारतीय संघाची घोषणा केली. या मालिकेतून भारतीय संघात अनुभवी फलंदाज विराट कोहली याचं पुनरागमन झालं आहे. त्यानंतर 24 तासांनी विराट कोहलीबाबत मोठी अपडेट समोर आली आहे.
विराट कोहली फटकेबाजीसाठी सज्ज
मीडिया रिपोर्ट्सनुसार, विराट कोहली फिटनेस टेस्टमध्ये पास झाला आहे. त्यामुळे विराट इंग्लंड विरूद्धच्या एकदिवसीय मालिकेत खेळू शकतो. विराट फिटनेस टेस्टमध्ये पास झाला तरच त्याला खेळता येईल या अटीवर त्याला इंग्लंड विरूद्धच्या एकदिवसीय मालिकेत स्थान देण्यात आलेलं. आता विराट फिट असल्याने भारतीय फलंदाजीची ताकद दुप्पटीने वाढली आहे.
भारतीय संघासह चाहत्यांना दिलासा
विराट फिटनेस टेस्टमध्ये पास झाल्याने भारतीय संघासह चाहत्यांना मोठा दिलासा मिळाला आहे. विराटला याच दुखापतीमुळे अफगाणिस्तान विरूद्धच्या एकदिवसीय मालिकेला मुकावं लागलं होतं. त्यात विराटला इंग्लंड विरुद्धही फिटनेसच्या अटीवरच संधी देण्यात आली होती. त्यामुळे विराट दुखापतीमुळे इंग्लंड विरुद्ध खेळू शकणार की नाही? अशी चिंता सतावत होती. मात्र विराट फिटनेस टेस्टमध्ये पास झाला आहे.
विराट 15 वर्षांची प्रतिक्षा संपवणार?
दरम्यान विराट इंग्लंड दौऱ्यात 15 वर्षांची प्रतिक्षा संपवणार का? हे पाहणं महत्त्वाचं ठरणार आहे. विराटने आतापर्यंत एकदिवसीय क्रिकेट कारकीर्दीत इंग्लंडमध्ये फक्त एकमेव शतक झळकावलं आहे. विराटने 2011 साली 93 चेंडूत 107 धावा केल्या होत्या. मात्र तेव्हापासून विराटच्या इंग्लंडमधील एकदिवसीय शतकाची चाहत्यांना प्रतिक्षा आहे. त्यामुळे विराट यंदा ही प्रतिक्षा संपवणार का? हे पाहणं महत्त्वाचं ठरणार आहे.
इंग्लंड विरुद्ध टीम इंडिया एकदिवसीय मालिकेचं वेळापत्रक
पहिला सामना, 14 जुलै, दुपारी साडे 3 वाजता
दुसरा सामना, 16 जुलै, संध्याकाळी साडे 5 वाजता
तिसरा सामना, 19 जुलै, दुपारी साडे 3 वाजता
इंग्लंड विरूद्धच्या एकदिवसीय मालिकेसाठी भारतीय संघ : शुबमन गिल (कर्णधार), रोहित शर्मा, विराट कोहली, श्रेयस अय्यर (उपकर्णधार), केएल राहुल (विकेटकीपर), ईशान किशन (विकेटकीपर), कुलदीप यादव, जसप्रीत बुमराह, प्रसिद्ध कृष्णा, हर्षित राणा, अर्शदीप सिंह, वॉशिंग्टन सुंदर, अक्षर पटेल, नितीश कुमार रेड्डी आणि गुरनूर ब्रार.
