पेट्रोल, डिझेलचे नवीन दर जारी; निर्यात शुल्कात मोठा फेरबदल, सरकारचा मोठा निर्णय, काय होणार परिणाम? | बिझनेस

नवीन अधिसूचनेनुसार पेट्रोलवरील निर्यात शुल्क 1.50 रुपये प्रति लिटरवरून वाढवून 4 रुपये प्रति लिटर करण्यात आले आहे. त्याचवेळी डिझेलवरील निर्यात शुल्क 14 रुपये प्रति लिटरवरून कमी करून 8.50 रुपये प्रति लिटर करण्यात आले आहे. याशिवाय एव्हिएशन टर्बाइन फ्युएल (ATF) वरील निर्यात शुल्क 12.50 रुपये प्रति लिटरवरून कमी करून 7.50 रुपये प्रति लिटर करण्यात आले आहे.

केंद्र सरकारने सार्वजनिक क्षेत्रातील तेल कंपन्यांना (PSU Oil Companies) आणखी एक महत्त्वाचा दिलासा दिला आहे. यापूर्वी नेपाळ, भूतान, बांगलादेश आणि श्रीलंका या देशांना पेट्रोल, डिझेल आणि एटीएफची निर्यात करताना निर्यात शुल्कातून सूट देण्यात आली होती. आता ही सवलत मॉरिशस आणि मालदीव या दोन देशांनाही लागू करण्यात आली आहे.

केंद्र सरकारने स्पष्ट केले आहे की, देशांतर्गत बाजारात विकल्या जाणाऱ्या पेट्रोल आणि डिझेलवरील विद्यमान उत्पादन शुल्क (Excise Duty) मध्ये कोणताही बदल करण्यात आलेला नाही. त्यामुळे देशांतर्गत ग्राहकांसाठी लागू असलेल्या उत्पादन शुल्काच्या दरांमध्ये कोणताही फरक पडणार नाही.

पश्चिम आशियातील तणावपूर्ण परिस्थितीच्या पार्श्वभूमीवर देशात पेट्रोलियम उत्पादनांचा पुरेसा साठा उपलब्ध राहावा आणि अनियंत्रित निर्यात टाळता यावी, या उद्देशाने केंद्र सरकारने 27 मार्च 2026 पासून पेट्रोल, डिझेल आणि एव्हिएशन टर्बाइन फ्युएल (ATF) यांच्या निर्यातीवर स्पेशल अॅडिशनल एक्साइज ड्युटी (SAED) आणि रोड अँड इन्फ्रास्ट्रक्चर सेस (RIC) लागू केला होता.