बॉलिवूडमधील सर्वाधिक लोकप्रिय आणि अजरामर आवाजांपैकी एक म्हणजे अलका याज्ञनिक. 90 च्या दशकात त्यांनी गायलेल्या असंख्य गाण्यांनी संगीतप्रेमींवर जादू केली. त्यापैकीच एक म्हणजे करण अर्जुन या चित्रपटातील ‘मुझको राणा जी माफ करना’ हे गाणे. आजही लग्नसमारंभ आणि विविध कार्यक्रमांमध्ये हे गाणे तितक्याच उत्साहाने वाजवले जाते.
मात्र, या गाण्याची लोकप्रियता भारतापुरती मर्यादित राहिली नाही. पाकिस्तानमध्येही हे गाणे प्रचंड गाजले. त्यानंतर या गाण्याचा पाकिस्तानी चित्रपटासाठी रिमेक करण्यात आला. पण हा रिमेक प्रेक्षकांच्या अपेक्षांवर उतरू शकला नाही. उलट सोशल मीडियावर त्याची मोठ्या प्रमाणात खिल्ली उडवण्यात आली.
1995 मध्ये प्रदर्शित झालेले गाणे आजही सुपरहिट
1995 मध्ये प्रदर्शित झालेल्या करण अर्जुन या चित्रपटात शाहरुख खान, सलमान खान, काजोल, राखी आणि ममता कुलकर्णी यांच्या प्रमुख भूमिका होत्या. चित्रपट बॉक्स ऑफिसवर मोठा हिट ठरला. या चित्रपटातील ‘मुझको राणा जी माफ करना, गलती म्हारे से हो गई’ हे गाणे अलका याज्ञनिक आणि इला अरुण यांनी गायले होते. या गाण्यामुळे विशेषतः ममता कुलकर्णी यांना मोठी लोकप्रियता मिळाली आणि त्या त्या काळातील आघाडीच्या अभिनेत्रींपैकी एक बनल्या.
पाकिस्तानी चित्रपटात झाला रिमेक
या गाण्याची लोकप्रियता पाहता 2000 साली पाकिस्तानमधील बनारसी चोर या चित्रपटात त्याचा रिमेक करण्यात आला. या चित्रपटात आबिद अली, नरगिस आणि रीमा यांच्या प्रमुख भूमिका होत्या.
रिमेकचे शीर्षकही जवळपास तेच ठेवण्यात आले. मात्र, मूळ गाण्यातील अनेक गोष्टी बदलण्यात आल्या. संपूर्ण गाण्याचे चित्रीकरण एका घरामध्ये करण्यात आले. तसेच खलनायकाच्या हावभावांमध्ये मूळ चित्रपटातील अमरीश पुरी यांच्या अभिनयाची नक्कल करण्याचा प्रयत्न दिसून आला.
रिमेकवर टीकेची झोड
जिथे मूळ गाण्याला आजही ‘कल्ट क्लासिक’चा दर्जा मिळतो, तिथे पाकिस्तानी रिमेकला मात्र सोशल मीडियावर मोठ्या प्रमाणात ट्रोलिंगला सामोरे जावे लागले. यूट्यूबवर या गाण्यावर प्रतिक्रिया देताना अनेकांनी तीव्र नाराजी व्यक्त केली. एका नेटकऱ्याने, नक्कल करायची असेल तरी अक्कल लागते अशी प्रतिक्रिया दिली. दुसऱ्याने, “बॉलिवूडमधून गाणं उचललं, पण त्याची पूर्ण वाट लावली असे म्हटले.
