बॉलिवूडचा ‘किंग खान’ म्हणून ओळखला जाणारा शाहरुख खान आजही लाखो चाहत्यांच्या हृदयावर राज्य करतो. त्याच्या अभिनयाची, व्यक्तिमत्त्वाची आणि मोहक शैलीची भुरळ केवळ प्रेक्षकांनाच नाही तर अनेक अभिनेत्रींनाही पडली होती. अशाच एका अभिनेत्रीने तब्बल 31 वर्षांनंतर एक रंजक आणि धक्कादायक किस्सा उघड केला आहे. शाहरुखच्या प्रेमात इतकी वेडी झालेली ही अभिनेत्री त्याची ऑनस्क्रीन बहीण बनण्यास तयारच नव्हती.
ही अभिनेत्री म्हणजे सादिया सिद्दीकी. नुकत्याच दिलेल्या एका मुलाखतीत तिने 1994 मध्ये प्रदर्शित झालेल्या ‘कभी हां कभी ना’ चित्रपटाशी संबंधित हा किस्सा सांगितला.
‘कभी हां कभी ना’च्या वेळी घडला होता प्रसंग
सादिया सिद्दीकी नुकतीच सिद्धार्थ कन्नन यांच्या पॉडकास्टमध्ये सहभागी झाली होती. या संवादादरम्यान तिने सांगितले की, ‘कभी हां कभी ना’ या चित्रपटासाठी सुरुवातीला तिला शाहरुख खानच्या बहिणीची भूमिका ऑफर करण्यात आली होती. मात्र ती भूमिका स्वीकारण्यास तिने स्पष्ट नकार दिला. त्यामागचे कारण विचारले असता सादियाने दिलेले उत्तर ऐकून सर्वांनाच आश्चर्याचा धक्का बसला.
सादियाने सांगितले की, त्या काळात ती शाहरुख खानवर प्रचंड प्रेम करत होती. त्याच्याविषयी तिच्या मनात विशेष भावना होत्या. त्यामुळे पडद्यावर त्याची बहीण बनण्याची कल्पनाही तिला सहन होत नव्हती. ती म्हणाली, मी शाहरुख खानच्या प्रेमात होते. त्यामुळे त्याची बहीण बनण्याचा विचारही करू शकत नव्हते. मला त्याची प्रेयसी बनायचं होतं, बहीण नाही.
अखेर बहिणीची भूमिका स्वीकारली
दिग्दर्शकांनी दुसरा कोणताही पर्याय न दिल्याने सादियाने अखेर शाहरुख खानच्या बहिणीची भूमिका स्वीकारली. चित्रपटात तिच्या अभिनयाचे अनेक प्रेक्षकांनी भरभरून कौतुक केले आणि ही भूमिका आजही अनेकांच्या लक्षात आहे.
तब्बल तीन दशकांनंतर सादिया सिद्दीकीने हा किस्सा सांगितल्यानंतर शाहरुख खानच्या चाहत्यांमध्येही त्याची जोरदार चर्चा सुरू झाली आहे. त्या काळात शाहरुख खानच्या लोकप्रियतेची जादू केवळ प्रेक्षकांवरच नाही तर त्याच्यासोबत काम करणाऱ्या कलाकारांवरही किती प्रभावी होती याची ही आठवण ठरली आहे.
