दक्षिण दिल्लीच्या संगम विहार भागातून हादरवणारी घटना समोर आली आहे. एका ३० वर्षीय महिलेची गोळ्या झाडून हत्या केल्याची घटना घडली आहे. तिच्या नवऱ्याने वादानंतर महिलेला संपवल्याची माहिती हाती आली आहे. बायकोची हत्या केल्यानंतर नवरा घटनास्थळावरून फरार झाला. ही संपूर्ण घटना गुरुवारी सायंकाळी ४ वाजण्याच्या सुमारास घडली.
पोलिसांच्या माहितीनुसार, शुभम राजपूत असे आरोपी नवऱ्याचे नाव आहे. त्याने बायकोची ४ गोळ्या झाडून हत्या केली. हत्येची माहिती मिळताच पोलिसांनी घटनास्थळी धाव घेतली. पोलिसांच्या तपासात घटनास्थळी निकामी काडतुसे आढळून आली आहेत.
पोलिसांच्या तपासातून माहिती समोर आली की, कविता आणि शुभम राजपूत या दोघांचं २ वर्षांपूर्वी लग्न झालं होतं. या दोघांमध्ये नेहमी वाद व्हायचे. नवरा शुभम हा बायको कविताला सारखा धमकी द्यायचा. अनेकदा त्याने जीवे ठार मारण्याची धमकी दिल्याचेही पोलीस तपासात उघड झालं आहे.
मृत कविताच्या नातेवाईकांच्या आरोपानुसार, शुभमचं एका महिलेसोबत अफेअर होतं. यामुळे दोघांमध्ये वाद व्हायचे. पोलिसांच्या दाव्यानुसार, आरोपीचं एका दुसऱ्या महिलेसोबत अफेअर होते. त्यामुळे तो नेहमी बायकोला जीवे मारण्याची धमकी द्यायचा. नातेवाईकांनी केलेल्या आरोपानुसारही तपास सुरू करण्यात आल्याचेही पोलिसांनी सांगितले. पोलिसांनी पुढे सांगितलं की, या प्रकरणी हत्येचा गुन्हा नोंदवण्यात आला आहे. फरार आरोपींचा शोध घेण्यासाठी अनेक पथके नेमण्यात आली आहेत. या प्रकरणाचा पुढील तपास सुरू आहे.
दिल्लीत गोळीबारात एकाचा मृत्यू
तत्पूर्वी, उत्तर दिल्लीच्या बवाना भागात गुरुवारी रात्री गोळीबारीची घटना घडली. पोलिसांना रात्री साडेआठ वाजता गोळीबार झाल्याची माहिती मिळाली. दिल्लीतील पूठ खुर्द गावात २२ वर्षीय तरुणाची गोळ्या झाडून हत्या करण्यात आली. घटनेची माहिती मिळताच पोलिसांनी घटनास्थळी धाव घेत गोळीबारात गंभीर जखमी झालेल्या तरुणाला रुग्णालयात दाखल केले. बाळकृष्ण असे जखमी झालेल्या तरुणाचे नाव आहे. बाळकृष्ण याच्यावर दोन अज्ञात हल्लेखोरांनी गोळीबार केला. २२ वर्षीय बाळकृष्ण याच्यावर गोळीबार करून हल्लेखोर फरार झाले. या घटनेने परिसरात खळबळ उडाली.
