दूरदर्शनच्या सुरुवातीच्या काळात अनेक मालिका प्रेक्षकांच्या मनावर अधिराज्य गाजवत होत्या. संध्याकाळ होताच संपूर्ण कुटुंब एकत्र बसून टीव्हीसमोर मालिकांचा आनंद घेत असे. त्या काळातील मालिकांमध्ये जादू, धाडस आणि लोककथांचा अनोखा संगम पाहायला मिळत होता.
विशेषतः मध्यपूर्वेतील कथांवर आधारित मालिकांनी प्रेक्षकांना एका वेगळ्याच जादुई विश्वात नेले होते. अशाच मालिकांपैकी एक म्हणजे ‘अलिफ लैला’, जी आजही प्रेक्षकांच्या स्मरणात तितक्याच प्रेमाने जिवंत आहे.
1990 च्या दशकातील मालिकांची सर्वात मोठी गोष्ट म्हणजे प्रत्येक भागात नवी कथा, नवे पात्र आणि नवे रहस्य. त्या काळात आधुनिक तंत्रज्ञान किंवा अत्याधुनिक व्हिज्युअल इफेक्ट्स नसतानाही कलाकारांचा अभिनय आणि कथानकाची ताकद इतकी प्रभावी होती की प्रेक्षक पूर्णपणे कथेत गुंतून जात असत.
याच काळात ‘अलिफ लैला’ या मालिकेने जादुई आणि काल्पनिक कथांना एक नवे व्यासपीठ दिले. दिग्दर्शक आनंद सागर आणि प्रेम सागर यांनी या मालिकेचे दिग्दर्शन केले होते. 1993 साली दूरदर्शनवर प्रथम प्रसारित झालेल्या या मालिकेने अल्पावधीतच लोकप्रियतेची शिखरे गाठली.
या मालिकेत अनेक लोकप्रिय कलाकारांनी भूमिका साकारल्या होत्या. अभिनेते शाहनवाज प्रधान, दिलीप धवन आणि असरानी यांसारख्या कलाकारांनी आपल्या अभिनयाने प्रत्येक पात्राला जिवंत केले. त्यामुळे ही मालिका दूरदर्शनवरील सर्वाधिक लोकप्रिय मालिकांपैकी एक ठरली.
