Eye Redness symptoms: पावसाळा उन्हाच्या कडाक्यापासून दिलासा देतो, पण त्याचबरोबर डोळ्यांच्या विविध समस्याही घेऊन येतो. या काळात नेत्रतज्ज्ञांकडे सर्वाधिक आढळणाऱ्या तक्रारींपैकी एक म्हणजे डोळे लाल होणे. अनेकांना डोळे लाल झाले की लगेच “आय फ्लू” झाल्याचा संशय येतो. मात्र, डोळे लाल होण्यामागे अनेक कारणे असू शकतात. काही कारणे सामान्य असतात, तर काही गंभीर आजारांचे संकेत असू शकतात आणि त्यासाठी तातडीने उपचारांची आवश्यकता असते. कल्याणच्या डॉ अगरवाल्स आय हॉस्पिटल येथे कॉर्निया आणि ऑक्युलर सरफेस रोग तज्ज्ञ डॉ. सोनल देसाई यांनी डोळ्यांच्या लालसरपानाची करणे आणि प्रतिबंधक उपाय सांगितले आहेत.
पावसाळ्यात डोळे लाल होण्याची सामान्य कारणे
व्हायरल कंजंक्टिव्हायटिस (आय फ्लू)पावसाळ्यात डोळे लाल होण्याचे हे सर्वात सामान्य कारण आहे. हा संसर्ग संक्रमित व्यक्तीच्या स्रावांद्वारे किंवा दूषित वस्तूंच्या संपर्कातून सहज पसरू शकतो.
लक्षणे:
डोळे लाल होणे
डोळ्यांतून पाणी येणे
डोळ्यात किरकिरी जाणवणे
पापण्यांना सौम्य सूज येणे
प्रकाशाची संवेदनशीलता वाढणे
अॅलर्जिक कंजंक्टिव्हायटिस : पावसाळ्यात वाढलेली आर्द्रता, बुरशीची वाढ, धूळ आणि इतर अॅलर्जन्स यांमुळे डोळ्यांची अॅलर्जी वाढू शकते.
लक्षणे:
तीव्र खाज येणे
डोळे लाल होणे
डोळ्यांतून पाणी येणे
पापण्या सुजणे
संसर्गाच्या विपरीत, अॅलर्जी हा संसर्गजन्य आजार नसतो.
ड्राय आय (डोळे कोरडे पडणे)
अनेकांना आश्चर्य वाटेल, पण पावसाळ्यातही डोळे कोरडे पडण्याची समस्या वाढू शकते. सतत स्क्रीनचा वापर, वातानुकूलित वातावरणात राहणे आणि कमी वेळा पापण्या लवणे यामुळे डोळ्यांत लालसरपणा आणि जळजळ होऊ शकते.
कधी लाल डोळे गंभीर समस्येचे संकेत असू शकतात?
प्रत्येक लाल डोळा हा साधा संसर्ग किंवा अॅलर्जीमुळेच झाला आहे असे नाही. काही वेळा डोळे लाल होणे हे गंभीर आजारांचे लक्षण असू शकते, जसे की: कॉर्नियल अल्सर
अॅक्युट ग्लॉकोमा
यूव्हायटिस
स्क्लेरायटिस या स्थितींमध्ये वेळेवर उपचार न घेतल्यास दृष्टीवर गंभीर परिणाम होऊ शकतो.
पावसाळ्यात डोळ्यांचे संरक्षण कसे कराल?
नियमितपणे हात स्वच्छ धुवा.
डोळे चोळणे टाळा.
टॉवेल, डोळ्यांचे सौंदर्यप्रसाधने किंवा आय ड्रॉप्स इतरांसोबत शेअर करू नका.
कॉन्टॅक्ट लेन्स वापरत असल्यास त्यांची योग्य स्वच्छता राखा.
स्क्रीनसमोर जास्त वेळ बसणे टाळा आणि नियमित विश्रांती घ्या.
डॉक्टरांचा सल्ला कधी घ्यावा?
खालीलपैकी कोणतीही लक्षणे आढळल्यास त्वरित नेत्रतज्ज्ञांचा सल्ला घ्यावा:
तीव्र डोळेदुखी
दृष्टी कमी होणे
प्रकाशाचा त्रास वाढणे
डोळ्यांतून जाड किंवा पिवळसर स्त्राव येणे
लालसरपणा अनेक दिवस कायम राहणे किंवा वाढणे
निष्कर्ष
पावसाळ्यात डोळे लाल होण्याची अनेक कारणे असू शकतात. बहुतेक वेळा अॅलर्जी किंवा व्हायरल संसर्ग हे कारण असले तरी, काही वेळा ते गंभीर डोळ्यांच्या आजारांचे संकेत असू शकतात. योग्य वेळी निदान आणि उपचार केल्यास गुंतागुंत टाळता येते आणि दृष्टी सुरक्षित ठेवता येते. त्यामुळे डोळ्यांकडे दुर्लक्ष न करता, कोणतीही असामान्य लक्षणे दिसल्यास त्वरित नेत्रतज्ज्ञांचा सल्ला घ्या.
Check out below Health Tools-
Calculate Your Body Mass Index ( BMI )
Calculate The Age Through Age Calculator
Gold Silver Rate Update : अमेरिका इजरायल आणि इराणमधील युद्धामुळे सोनं आणि चांदीच्या दरात मोठी घसरण
