Gold Silver Price: अमेरिका-इराण युद्ध थांबताच चित्र फिरलं, सोने-चांदी दरात मोठी वाढ, एक तोळा सोन्याचा आजचा भाव किती?

Gold Silver Price: गेल्या अनेक दिवसांपासून इराण विरुद्ध अमेरिका-इस्रायल यांच्यात सुरु असलेल्या युद्ध आता थांबले आहे. इराण आणि अमेरिका यांच्यात शांतता कराराचा (Iran America Deal) मसुदा निश्चित झाला असून 19 जानेवारीला त्यावर जिनिव्हा येथे स्वाक्षरी केली जाईल. त्यामुळे संपूर्ण जगाला वेठीला धरणारे हे युद्ध संपुष्टात येणार आहे. मात्र, त्यापूर्वीच युद्ध संपल्याच्या बातमीने आंतरराष्ट्रीय पातळीवर भांडवली आणि वायदे बाजारात सकारात्मक पडसाद पाहायला मिळत आहेत. अमेरिका इराणमधील (Iran) युद्ध आता संपण्याचे संकेत मिळताच सोने (Gold price) आणि चांदीच्या दरात मोठी वाढ झाल्याचं पाहायला मिळत आहे. (Gold and Silver Todays price)

शनिवारी बाजारपेठ बंद होताना सोन्याचा प्रतितोळा भाव 1 लाख 48 हजार 300 रुपये इतका होता. तो सोमवारी बाजार उघडताच 1 लाख 51 हजार रुपये प्रतितोळा इतका झाला आहे. सोन्याच्या दरात 2700 रुपयांची मोठी वाढ झाल्याचे पाहायला मिळत आहे. तर चांदीच्या दरात ही प्रतिकिलो तब्बल 10 हजार रूपयांची वाढ होऊन, शनिवारी असलेले 2 लाख 44 हजार रुपयांचे दर आज दोन लाख 54 हजार रुपयांवर जाऊन पोहोचले आहेत. दोन्ही दर हे जीएसटी वगळून आहेत. अमेरिका इराणमधील युद्ध पूर्णपणे थांबले आहे, असे चित्र स्पष्ट झाले तर पुढील काळात सोने चांदी दरात अजूनही मोठी वाढ होण्याचे संकेत मिळत आहेत. सोन्यात गुंतवणूक करणाऱ्यांसाठी यामुळे अच्छे दिन आले आहेत. अमेरिका आणि इराण यांच्यात तीन टप्प्यांमध्ये शांती कराराची अंमलबजावणी होईल. त्यानंतर सोने आणि चांदीच्या दरात वाढ होऊ शकते, असा अंदाज आहे.

अमेरिका-इराण युद्ध थांबणार असे स्पष्ट होताच जगभरातील भांडवली बाजार, खनिज तेलाचे दर या सर्व ठिकाणी परिणाम पाहायला मिळत आहे. अमेरिका आणि इराण यांच्यातील कराराची घोषणा झाल्यानंतर क्रूड ऑईलच्या दरात घसरण झाली. दुसरीकडे आशियाई बाजारांमध्ये जोरदार तेजी पाहायला मिळाली. सेन्सेक्स आणि निफ्टीत दीड-दीड टक्क्यांची तेजी दिसून आली. सेन्सेक्समध्ये 1300 अंकांपर्यंत तेजी दिसून आली आणि निफ्टी 50 नं देखील 24 हजारांचा टप्पा पार केला. निफ्टी मिडकॅप 100 आणि निफ्टी स्मॉलकॅप 100 मध्येही दीड टक्क्यांची तेजी दिसून आली आहे.