सांगलीत भयंकर घटना घडली आहे. सांगलीच्या भरवस्तीत एका माथाडी नेत्याच्या घरात चार ते पाच अज्ञात हल्लेखोरांनी घुसून त्याच्या अवघ्या १४ वर्षांच्या नातवाची हत्या केल्याची धक्कादायक घटना घडली आहे. या घटनेने संपूर्ण सांगली जिल्हा हादरला असून पोलिसांनी या प्रकरणात हल्लेखोरांच्या शोधासाठी विविध पथके रवाना केली आहे. या मुलाची अशा प्रकारे हत्या झाल्याने संपू्र्ण सांगली शहर सुन्न झाले आहे.
सांगलीमध्ये भरवस्तीमध्ये एका स्थानिक नेत्याच्या घरात घुसून चार ते पाच हल्लेखोरांनी अंधाधुंद गोळीबार केल्याची घटना घडली आहे. सायंकाळी सात वाजण्याच्या सुमारास घडलेल्या या हल्ल्यात घरातील एका १४ वर्षांचा चिमुरडा जखमी होऊन त्याचे प्राण गेले आहेत. त्यामुळे सांगलीत घबराट पसरली आहे. सांगलीच्या भरवस्तीत या अचानक झालेल्या घटनेने सांगली हादरली आहे.
नातवाला गोळ्या घातल्या
सांगलीतील माथाडी नेते बाळासाहेब बंडगर यांच्या घरात शिरलेल्या चार ते पाच मारेकऱ्यांनी अंधाधुंद गोळीबार केला.आधी मारेकऱ्यांनी हवेत गोळीबार केला आणि त्यानंतर त्यांनी केलेल्या गोळीबारात माथाडी नेते बाळासाहेब बंडगर यांचा नातू वेदांत मारुती बंडगर (वय १४ ) याला देखील गोळ्या घातल्या. त्यात गंभीर जखमी झालेल्या वेदांत याचा रुग्णालयात दाखल करण्याआधीच मृत्यू झाल्याने खळबळ उडाली आहे.
मारुती बंडगर यांचा मुलगा वेदांत मारुती बंडगर ( १४ ) हा गंभीर जखमी झाल्यानंतर त्याला रुग्णालयात नेण्याचा प्रयत्न केला. मात्र, डॉक्टरांनी त्याला तपासून मृत घोषीत केले. या घटनेनंतर पोलिसांनी संपूर्ण परिसराची नाकाबंदी केली असून विविध ठिकाणे पथके रवाना केली आहेत.
नातेवाईकांचा एकच आक्रोश
या घटनेनंतर परिसरामध्ये एकच खळबळ उडाली आहे. घटनेची माहिती मिळतात संजय नगर पोलिसांच्या सह पोलीस अधीक्षक तुषार जोशी घटनास्थळी दाखल झाले. हल्लेखोराच्या शोधासाठी पथके रवाना करण्यात आली आहेत. जिल्ह्यात नाकाबंदी देखील करण्यात आली आहे. व्यवसायिक वादातून ही घटना झाल्याच्या प्राथमिक अंदाज पोलिसांनी वर्तवला आहे. नंतर संजय नगर परिसरामध्ये मोठा पोलीस बंदोबस्त तैनात करण्यात आला आहे.तर शवविच्छेदनासाठी वेदांतचा मृतदेह सांगलीच्या शासकीय रुग्णालयामध्ये पाठवण्यात आला असून या ठिकाणी नातेवाईकांनी एकच आक्रोश केला आहे.
