NDA and INDIA bloc MPs came face to face: संसदेच्या पावसाळी अधिवेशनाच्या चौथ्या दिवशी, संसद भवन परिसरात एनडीए आणि विरोधी पक्ष आमनेसामने आले. काँग्रेस अध्यक्ष मल्लिकार्जुन खरगे, लोकसभेतील विरोधी पक्षनेते राहुल गांधी, प्रियांका गांधी आणि समाजवादी पक्षाचे प्रमुख अखिलेश यादव यांच्यासह विरोधी पक्षाच्या खासदारांनी सरकारविरोधात निदर्शने केली. इंडिया आघाडीच्या खासदारांसमोर एनडीएचे खासदारही या आंदोलनात सामील झाले. दोन्ही बाजूंनी एकमेकांविरोधात घोषणाबाजी केली. 21 जुलै रोजी पंतप्रधानांच्या निवासस्थानाबाहेर राहुल गांधींनी केलेल्या आंदोलनाचा एनडीएचे खासदार निषेध करत आहेत.
प्रियांका गांधी सुरक्षा कर्मचाऱ्यांनी रोखलं
दरम्यान, नीट पेपरफुटी प्रकरणी शिक्षणमंत्री धर्मेंद्र प्रधान यांच्या राजीनाम्याची मागणी इंडिया आघाडीने केली आहे. आंदोलनादरम्यान प्रियांका गांधी एनडीएच्या खासदारांच्या अगदी जवळ गेल्या, परंतु सुरक्षा कर्मचाऱ्यांनी हस्तक्षेप करून त्यांना रोखले. संसदेच्या आतही हा गदारोळ सुरूच होता, ज्यामुळे लोकसभा आणि राज्यसभेचे कामकाज दुपारी 2 वाजेपर्यंत तहकूब करण्यात आले. दुपारी 2 वाजता लोकसभेचे कामकाज पुन्हा सुरू झाल्यावर प्रचंड गदारोळ झाला, ज्यामुळे शुक्रवारी सकाळी 11 वाजेपर्यंत सभागृहाचे कामकाज तहकूब करण्यात आले.
पंतप्रधान दुसरीच गोष्ट सांगत आहेत
दुसरीकडे, पेपरफुटीच्या प्रकरणांची सुनावणी करण्यासाठी जलदगती न्यायालय स्थापन करण्यासंदर्भात पंतप्रधान नरेंद्र मोदी यांनी केलेल्या ‘एक्स’ पोस्टवर विरोधी पक्षांच्या नेत्यांनी प्रतिक्रिया दिली आहे. विरोधी पक्षांच्या नेत्यांनी सरकारवर निशाणा साधला आहे. काँग्रेस नेत्या प्रियांका गांधी म्हणाल्या, “हे म्हणजे जणू काही मुले एक गोष्ट सांगत आहेत आणि तुम्ही (पंतप्रधान) दुसरीच गोष्ट सांगत आहात. नेत्यांनी नेतृत्व दाखवण्याची हीच वेळ आहे. त्यांनी मुलांचे ऐकले पाहिजे. धर्मेंद्र प्रधान यांनी राजीनामा द्यावा आणि ज्यांनी त्यांच्यावर हल्ला केला त्यांच्यावर कारवाई करावी, या मुलांच्या स्पष्ट मागण्या आहेत. त्यांनी आधी मुलांच्या मागण्यांकडे लक्ष दिले पाहिजे. व्यवस्थेवरील मुलांचा विश्वास पूर्णपणे तुटला आहे.”
प्रियांका गांधी पुढे म्हणाल्या की, जर व्यवस्थेनेच काही तोडगा काढला, तर मुले तो स्वीकारणार नाहीत. जर पंतप्रधानांना तोडगा काढायचा असेल, तर त्यांनी मुलांचे ऐकून त्यांच्या मागण्या पूर्ण केल्या पाहिजेत; तरच तोडगा निघेल. पेपरफुटीत सहभागी असलेल्यांना कठोर शिक्षा मिळावी यासाठी जलदगती न्यायालये स्थापन करण्यासंदर्भात पंतप्रधान मोदींच्या ‘एक्स’ पोस्टवर, काँग्रेस खासदार के. सी. वेणुगोपाल म्हणाले, “आजकाल त्यांच्या शब्दांवर कोणीही विश्वास ठेवत नाही. त्यांच्या शब्दांवरील विश्वास आधीच उडाला आहे. आधी त्यांनी धर्मेंद्र प्रधान यांना शिक्षण मंत्रालयातून काढून टाकले पाहिजे. त्यानंतर त्यांनी विद्यार्थ्यांशी बोलले पाहिजे.”
शिक्षणमंत्र्यांनी राजीनामा दिल्यासच आम्ही चर्चेसाठी तयार
मल्लिकार्जुन खरगे म्हणाले, “शिक्षणमंत्र्यांनी राजीनामा दिल्यासच आम्ही चर्चेसाठी तयार असू.” राज्यसभेचे कामकाजही सकाळी 11 वाजता गोंधळाच्या वातावरणात सुरू झाले. विरोधी पक्षनेते मल्लिकार्जुन खर्गे म्हणाले, “पंतप्रधानांचे आजचे वक्तव्य प्रक्षोभक आहे. शिक्षणमंत्र्यांनी राजीनामा द्यावा, तरच आम्ही चर्चेसाठी तयार होऊ.”
इतर महत्वाच्या बातम्या
Fadnavis Daughter X Post : सीजेपी आंदोलनावर मुख्यमंत्र्यांच्या कन्या दिविजा फडणवीसांची प्रतिक्रिया
