भारतीय चित्रपटसृष्टीत स्टारडमचा विषय निघाला की बॉलिवूडचा बादशाह शाहरुख खान, दक्षिणेतील सुपरस्टार प्रभास, थलपती विजय, अल्लू अर्जुन, ज्युनिअर एनटीआर यांसारख्या दिग्गज कलाकारांची नावे अग्रक्रमाने घेतली जातात. मात्र, प्रेक्षकांची पसंती वेळोवेळी बदलत असते आणि त्यामुळे सध्या देशातील सर्वाधिक लोकप्रिय स्टार कोण, याबाबत कायमच चाहत्यांना उत्सुकता असते.
अशातच Ormax Media ने जून 2026 साठीची ‘Stars India Loves’ ही लोकप्रियता रँकिंग जाहीर केली असून, यावेळीही अनेक दिग्गज कलाकार या यादीत स्थान मिळवण्यात यशस्वी ठरले आहेत. मात्र, पहिल्या क्रमांकावर पुन्हा एकदा ‘बाहुबली’ फेम सुपरस्टार प्रभास याने बाजी मारत बॉलिवूडचा किंग शाहरुख खान आणि तमिळ सुपरस्टार थलपती विजय यांनाही मागे टाकले आहे.
प्रभास पुन्हा अव्वल
Ormax Media च्या जून 2026 च्या ‘Stars India Loves’ रँकिंगमध्ये प्रभासने अव्वल स्थान पटकावले आहे. या रँकिंगमध्ये प्रेक्षकांची पसंती, लोकप्रियता आणि स्टारबद्दलची उत्सुकता यांचा विचार केला जातो. त्यामुळे चित्रपटसृष्टीत या यादीला विशेष महत्त्व दिले जाते.
प्रभासची लोकप्रियता केवळ दक्षिण भारतापुरती मर्यादित नाही तर देशभरात आणि परदेशातही त्याचा मोठा चाहतावर्ग आहे. त्याच्या चित्रपटांची घोषणा होताच सोशल मीडियावर मोठी चर्चा सुरू होते, हे त्याच्या वाढत्या स्टारडमचे उदाहरण मानले जाते.
‘बाहुबली’ने दिली जागतिक ओळख
प्रभासने आपल्या कारकिर्दीत अनेक यशस्वी चित्रपट दिले असले, तरी ‘बाहुबली’ या चित्रपटाने त्याला जागतिक स्तरावर वेगळी ओळख मिळवून दिली. या चित्रपटाने भारतीय सिनेमाला आंतरराष्ट्रीय स्तरावर नवी ओळख निर्माण करून दिली.
यानंतर ‘सालार’ आणि ‘कल्कि 2898 AD’ यांसारख्या भव्य चित्रपटांमधून प्रभासने तो केवळ अॅक्शन स्टार नसून मोठ्या चित्रपटांसाठी विश्वासार्ह चेहरा असल्याचे सिद्ध केले. त्याचे दमदार व्यक्तिमत्त्व आणि विविध भूमिका साकारण्याची क्षमता त्याला इतर कलाकारांपेक्षा वेगळे स्थान मिळवून देते.
शाहरुख खानची लोकप्रियताही कायम
प्रभास अव्वल स्थानावर असला तरी शाहरुख खानची लोकप्रियता अजूनही तितकीच मजबूत आहे. ‘पठाण’, ‘जवान’ आणि ‘डंकी’ या सलग यशस्वी चित्रपटांमुळे शाहरुखने दमदार पुनरागमन करत बॉक्स ऑफिसवर पुन्हा एकदा आपले वर्चस्व सिद्ध केले.
भारतासह जगभरात त्याच्या चित्रपटांना मोठा प्रतिसाद मिळतो. तसेच त्याचा आगामी ‘किंग’ हा चित्रपटही प्रेक्षकांमध्ये प्रचंड चर्चेत असून, त्याची चाहते आतुरतेने वाट पाहत आहेत.
