राजस्थानात मराठी अभ्यासकेंद्र उभारा म्हटल्याने राज्यपाल हरिभाऊ बागडेंचा पुतळा जाळला, मराठी vs राजस्थानी वाद! | महाराष्ट्र बातम्या

नेमका काय आहे वाद?

राजस्थानचे राज्यपाल म्हणून जबाबदारी सांभाळणारे हरिभाऊ बागडे हे पदसिद्ध अधिकारानुसार राजस्थान विद्यापीठाचे कुलपती आहेत. त्यांनी विद्यापीठाअंतर्गत मराठी भाषेचा अभ्यास आणि संशोधन व्हावे या उद्देशाने राजस्थानात ‘मराठी स्टडी सेंटर’ उभारण्यासंदर्भात निर्देश दिले होते.

मात्र, राज्यपालांच्या या निर्देशांनंतर राजस्थानमधील काही स्थानिक नागरिक आणि संघटना आक्रमक झाल्या आहेत. राजस्थानात मराठी भाषेचे शिक्षण कशासाठी हवे? असा सवाल उपस्थित करत त्यांनी या निर्णयाला तीव्र विरोध दर्शवला आहे.

फोटो आणि पुतळा जाळून निषेध

या निर्णयामुळे संतापलेल्या आंदोलकांनी हरिभाऊ बागडे यांच्याविरोधात घोषणाबाजी करत त्यांचे फोटो आणि पुतळे जाळले. राज्यस्थानातील स्थानिक संस्कृती आणि भाषेला डावलून इतर भाषेचे केंद्र कशासाठी उभे केले जात आहे, असा सूर आंदोलकांकडून लावला जात आहे. या घटनेमुळे राजस्थानमध्ये अचानक मराठी भाषेवरून वाद पेटला असून वातावरणात तणाव निर्माण झाला आहे.

महाराष्ट्रात मराठी भाषेबरोबर हिंदी भाषेच्या समर्थनासाठी आग्रही राहणाऱ्या भाजपच्याच नेत्याला राजस्थानमध्ये मराठी भाषेचा प्रसार करण्याचा प्रयत्न करताना स्थानिक विरोधाचा सामना करावा लागत असल्याने या घटनेची राजकीय वर्तुळात जोरदार चर्चा सुरू आहे.