Jasprit Bumrah: जसप्रीत बुमराहचं तीन वर्षानंतर पुनरागमन, इंग्लंडमध्ये मोडला मोठा विक्रम Image Credit source: BCCI Twitter
Jasprit Bumrah, IND vs ENG 1st ODI: बर्मिंघमच्या एजबेस्टन मैदानात नाणेफेकीचा कौल इंग्लंडच्या बाजूने लागला आणि भारताच्या वाटेला प्रथम गोलंदाजी आली. या सामन्यातून जसप्रीत बुमराहचं पुन्हा एकदा वनडे क्रिकेटमध्ये पदार्पण झालं. इंग्लंडविरुद्धच्या सामन्यात संधी मिळताच जसप्रीत बुमराहने आपल्या भेदक गोलंदाजीचा नजराणा सादर केला. या सामन्यात त्याच्या गोलंदाजीला आणखी धार चढल्याचं दिसून आलं. इतकंच काय तर विकेट घेत एक मोठा विक्रमही आपल्या नावावर केला. जसप्रीत बुमराहने दुसऱ्या स्पेलच्या पहिल्या चेंडूवर इंग्लंडचा कर्णधार हॅरी ब्रूक याला बाद केलं आणि आंतरराष्ट्रीय क्रिकेटमध्ये आपला दबदबा असल्याचं पुन्हा एकदा सिद्ध केलं.
हॅरी ब्रूक पाठवलं तंबूत
जसप्रीत बुमराहने पहिला स्पेल चांगला टाकला. मात्र त्याला काही विकेट मिळाली नाही. इंग्लंडचे फलंदाज मात्र त्याचा सामना करताना अडचणीत आले. त्यामुळे कर्णधार शुबमन गिलने त्याला दुसरा स्पेल टाकण्यासाठी लवकरच बोलवलं. या स्पेलच्या पहिल्याच चेंडूवर शुबमन गिलने कमाल केली. बुमराहने ऑफ स्टम्पच्या बाहेर शॉर्ट ऑफ लेंथ चेंडू टाकला. त्यामुळे चेंडूला उसळी आणि बाहेरच्या दिशेने मार्ग मिळाला. इंग्लंडचा कर्णधार हॅरी ब्रूक हा चेंडू खेळताना चुकला आणि रोहित शर्माच्या हाताता झेल देऊन बाद झाला. या विकेटसह जसप्रीत बुमराह इंग्लंडच्या भूमीत सर्वाधिक विकेट घेणारा भारतीय गोलंदाज ठरला आहे. या यादीत त्याने रवींद्र जडेजाला मागे टाकलं. जसप्रीत बुमराहचे इंग्लंडमध्ये 31 विकेट झाले आहेत.
इंग्लंडमध्ये भारतासाठी सर्वाधिक वनडे विकेट घेणारे गोलंदाज
- जसप्रीत बुमराह: 31 विकेट
- रवींद्र जडेजा: 30 विकेट
- भुवनेश्वर कुमार: 28 विकेट
- मदन लाल: 27 विकेट
- मोहम्मद शमी: 26 विकेट
जसप्रीत बुमराहने वनडे क्रिकेटमध्ये 150 विकेटचा पल्लाही गाठला आहे. हॅरी ब्रूकची विकेट त्याच्या वनडे कारकिर्दीतील 150वी विकेट होती. बुमराहाने 90 वनडे सामन्यात ही कामगिरी केली आहे. भारतासठी वनडे क्रिकेटमध्ये झटपट 150 विकेट घेणारा तिसरा गोलंदाज ठरला आहे. यापूर्वी मोहम्मद शमीने 80 सामन्यात, कुलदीप यादव 88 सामन्यात ही कामगिरी केली आहे. विशेष म्हणजे कसोटीत 150वी विकेटही इंग्लंडचा कर्णधारच होता. त्याने तेव्हा बेन स्टोक्सला बाद करून 150 वी विकेट साजरी केली होती.
