कुमार सानू आणि त्यांचा मुलगा जान सानूImage Credit source: Instagram
बॉलिवूडचे प्रसिद्ध गायक कुमार सानू यांचा मुलगा आणि गायक जान सानूला कोरोनाचं निदान झालं आहे. रविवारी 12 जुलै रोजी त्याने खुद्द सोशल मीडियाद्वारे याबाबतची माहिती दिली आहे. जान सध्या रुग्णालयात दाखल असून त्याच्यावर उपचार सुरू आहेत. जान सानूने रुग्णालयातील एक व्हिडीओसुद्धा शेअर केला आहे. देशातील इतर भागांमध्येही कोविड-19 चे रुग्ण वाढत आहेत. त्याचवेळी मुंबईत जानलाही कोरोनाची लागण झाली आहे. आंध्र प्रदेशात कोरोनाचे आठ रुग्ण आढळले असून त्यापैकी दोन जणांचा मृत्यू झाल्याचं वृत्त आहे.
जान सानूने रुग्णालयातील व्हिडीओ शेअर करत लिहिलं, ‘चीन से आया मेरा दोस्त, कोविड को सलाम करो’. रुग्णालयात असतानाही हलकेफुलके विनोद करत तो सकारात्मक राहण्याचा प्रयत्न करत आहे. त्याच्या या व्हिडीओवर नेटकऱ्यांनी प्रतिक्रिया लिहित त्याला काळजी घेण्याचं आवाहन केलं आहे. आतापर्यंत अल्फा, बीटा, गॅमा, डेल्टा आणि ओमक्रॉनसह हजारो कोरोना व्हायरलचे प्रकार समोर आले आहेत. भारतात 30 जानेवारी 2020 रोजी पहिला कोविड-19 चा रुग्ण आढळला होता. तर कोविड-19 ची पहिली केस डिसेंबर 2019 मध्ये चीनमधील वुहान इथं नोंदवली गेली होती.
जान कुमार सानू हा कुमार सानू आणि त्यांची पहिली पत्नी रीटा भट्टाचार्य यांचा मुलगा आहे. कुमार सानू आणि रीटा यांनी 1986 मध्ये लग्न केलं होतं. मात्र 1994 मध्ये त्यांचा घटस्फोट झाला. त्यानंतर कुमार सानू यांनी 2001 मध्ये सलोनी भट्टाचार्यशी लग्न केलं. ‘बिग बॉस’ या शोमध्ये जेव्हा जान स्पर्धक म्हणून सहभागी झाला होता, तेव्हा त्याने त्याच्या वडिलांबद्दल अनेक खुलासे केले होते. “माझ्या वडिलांनी माझ्यासाठी किंवा माझ्या आईसाठी कधीच काही केलं नाही. मी कुमार सानूचा मुलगा असल्यामुळे इंडस्ट्रीतील अनेक लोकांनी मला काम देण्यास नकार दिला. माझी आई सहा महिन्यांची गरोदर असताना वडिलांनी घटस्फोट दिला होता. मला माझ्या आईनेच लहानाचं मोठं केलं,” असं तो म्हणाला होता.
दरम्यान कोरोना संसर्गाची प्रकरणं पुन्हा वाढत असताना कोरोना विषाणूची लक्षणं, प्रतिबंध आणि खबरदारी याबद्दल जाणून घेणं अत्यंत महत्त्वाचं ठरतं. चव न जाणवलं, वास न येणं, श्वास घेण्यास त्रास होणं, सर्दीसारखी लक्षणं, पोट खराब होणं किंवा अतिसार ही सामान्य लक्षणं आहेत.
