इराणकडून टार्गेट लिस्ट प्रसिद्ध, सर्वात टॉपवर ट्रम्प नव्हे तर हा नेता; यादीत इटलीच्या मेलोनी देखील, वृत्तपत्राच्या पहिल्या पानावर फोटो छापले | विदेश बातम्या

इराणच्या ‘हमशहरी’ या सरकारी वृत्तपत्राने आपल्या पहिल्या पानावर जगातील 11 प्रभावशाली नेत्यांची छायाचित्रे प्रसिद्ध केली आहेत. वृत्तपत्राने ही छायाचित्रे कैद्यांच्या पोशाखासारख्या स्वरूपात दाखवत त्यावर मोठ्या अक्षरांत “बदला निश्चित आहे” असा संदेश प्रसिद्ध केल्याचे वृत्त आहे.

वृत्तांनुसार, या नेत्यांना अयातुल्ला अली खामेनेई यांच्या मृत्यूस थेट जबाबदार ठरवत वृत्तपत्राने त्यांच्यावर गंभीर आरोप केले आहेत. या कथित यादीमुळे आंतरराष्ट्रीय राजकारणात तणाव वाढला असून अनेक देशांनी सुरक्षा व्यवस्था अधिक मजबूत केल्याचे वृत्त आहे.

इराणने अमेरिका आणि इस्रायलसोबतच काही युरोपीय देशांवरही आरोप केले आहेत. युद्धादरम्यान इराणवरील हल्ल्यांचा निषेध करण्यात हे देश अपयशी ठरल्याचा आरोप करण्यात आला आहे. तसेच अमेरिकन लष्करी विमानांना आपल्या हवाई हद्दीचा वापर करण्यास परवानगी देऊन त्यांनी अप्रत्यक्षपणे हल्ल्यांना मदत केल्याचा दावाही इराणकडून करण्यात आला आहे.

युद्ध सुरू झाल्यापासून अयातुल्ला अली खामेनेई यांचे पुत्र मोजतबा खामेनेई सार्वजनिकरित्या दिसलेले नाहीत. काही वृत्तांमध्ये ज्या हल्ल्यात त्यांच्या वडिलांचा मृत्यू झाला त्याच हल्ल्यात मोजतबा खामेनेई हेही जखमी झाल्याचा दावा करण्यात आला आहे. मात्र या दाव्याची स्वतंत्रपणे अधिकृत पुष्टी झालेली नाही.

या कथित ‘टार्गेट लिस्ट’मुळे आधीच तणावपूर्ण असलेल्या मध्यपूर्वेतील परिस्थिती आणखी चिघळण्याची शक्यता व्यक्त केली जात आहे. विश्लेषकांच्या मते अशा प्रकारचे संदेश आणि प्रचारामुळे राजनैतिक संबंधांवर परिणाम होऊ शकतो तसेच जागतिक सुरक्षेची चिंता वाढू शकते.