Mamata Banerjee: पश्चिम बंगाल विधानसभा निवडणुकीतील पराभवानंतर तृणमूल काँग्रेसमध्ये (TMC) सुरू असलेल्या बंडखोरीच्या पार्श्वभूमीवर ममता बॅनर्जी म्हणाल्या की, पक्षाचे निवडणूक चिन्ह कुठेही जाणार नाही. तुम्हाला मला थांबवायचे असेल, तर तुम्हाला मला मारावे लागेल. बंडखोर नेत्यांना आव्हान देत ममता बॅनर्जी म्हणाल्या, “तुमच्यात हिंमत असेल, तर उघडपणे भाजपमध्ये सामील व्हा. तुम्हाला वाटते का मी संपले आहे? मी पक्षाच्या निवडणूक चिन्हासह लोकांमध्ये जाईन; माझा आवाज कोणीही दाबू शकत नाही.” त्यांनी आरोप केला की, बंडखोर नेते आता उघडपणे भाजपसाठी काम करत आहेत. ममता बॅनर्जी म्हणाल्या, “गद्दारीला एक मर्यादा असते.” हे वक्तव्य अशा वेळी आले आहे, जेव्हा पक्षाच्या 20 खासदार आणि 58 आमदारांनी वेगवेगळे गट तयार केले आहेत. शनिवारी, टीएमसी पश्चिम बंगालच्या अध्यक्षा चंद्रिमा भट्टाचार्य यांनीही आपल्या पदाचा राजीनामा दिला. नंतर, त्या बंडखोर गटाचे नेते आणि विधानसभेतील विरोधी पक्षनेते ऋतब्रता बॅनर्जी यांच्यासोबत दिसल्या.
ममता बॅनर्जी यांनी आव्हान का दिले?
ममता बॅनर्जी यांची साथ सोडलेले बंडखोर आमदार आणि खासदार अद्याप भाजपमध्ये सामील झालेले नाहीत. 3 जून रोजी, टीएमसीच्या 80 आमदारांपैकी 58 आमदार ममता बॅनर्जी यांच्या नेतृत्वापासून वेगळे झाले. त्यांनी एक वेगळा गट स्थापन करून पक्षाचे चिन्ह आणि नावावर दावा केला. याव्यतिरिक्त,15 जून रोजी टीएमसीच्या 20 खासदारांनीही पक्ष सोडला आणि त्रिपुराच्या नॅशनलिस्ट सिटिझन्स पार्टीमध्ये (एनसीपीआय) विलीन झाले. ममता म्हणाल्या, “ज्या पक्षाच्या ताकदीवर त्यांनी निवडणुका जिंकल्या, आता ते पक्षाशी गद्दारी करत आहेत.”
हिंमत असेल तर उघडपणे भाजपमध्ये सामील व्हा
ममता बॅनर्जी म्हणाल्या की, ज्या नेत्यांनी त्यांच्या पक्षाच्या चिन्हावर निवडणुका जिंकल्या, ते आता म्हणत आहेत की 2023 नंतर पक्षाचे अस्तित्वच राहणार नाही. पक्षानेच त्यांना राजकीय मान्यता दिली, पण आता ते त्याच पक्षाशी गद्दारी करून उघडपणे भाजपसाठी काम करत आहेत. तुमच्यात हिंमत असेल तर उघडपणे भाजपमध्ये सामील व्हा. काही व्यक्तींनी केंद्रीय दलांच्या मदतीने तृणमूल भवन ताब्यात घेतले. या इमारतीचे भाडे ऑक्टोबर 2027 पर्यंत जमा असून पक्ष दरमहा एक लाख रुपये देतो. ही कोणत्याही व्यक्तीची मालमत्ता नाही, तर ‘आई, माती, माणूस’ यांची आहे. इमारत ताब्यात घेतली जाऊ शकते, पण लोकांची मने नाही. भाजपने मतांमध्ये, मतदार याद्यांमध्ये आणि मतमोजणी प्रक्रियेत फेरफार करून सत्ता मिळवली. केंद्रीय दलांच्या मदतीने मतमोजणी केंद्रे ताब्यात घेऊन संपूर्ण प्रक्रिया हायजॅक केली. असे असूनही, आम्ही नवीन सरकार स्वीकारले आहे.
ऋतब्रता बॅनर्जी यांना नेते म्हणून निवडले
टीएमसीमधील बंडाची बातमी सर्वप्रथम 3 जून रोजी समोर आली. निवडून आलेल्या 80 टीएमसी आमदारांपैकी 58 आमदारांनी पक्षातून काढून टाकलेले आमदार ऋतब्रता बॅनर्जी यांना नेतेपदी निवडत विधानसभा अध्यक्ष रतिंद्र बोस यांना पाठिंब्याचे पत्र सादर केले. ऋतब्रता यांना विरोधी पक्षनेते म्हणून घोषित करण्याची मागणी करण्यात आली. अध्यक्षांनी यास मंजुरी दिली. 22 जून रोजी झालेल्या प्रतिनिधींच्या बैठकीत नवीन अध्यक्ष, उपाध्यक्ष आणि 30 सदस्यीय राष्ट्रीय कार्यकारी समिती स्थापन करण्यात आली.
ममता बॅनर्जी यांच्याकडे आता 22आमदार आणि 17 खासदार
टीएमसीचे लोकसभेत एकूण 28 खासदार होते, त्यापैकी 20 जणांमध्ये फूट पडली आहे. ममता बॅनर्जी यांच्याकडे आता लोकसभेत फक्त 8 खासदार उरले आहेत. राज्यसभेत 13 पैकी 4 खासदारांनी राजीनामा दिल्याने, आता फक्त 9 राज्यसभा खासदार उरले आहेत.
इतर महत्वाच्या बातम्या
Ashwini Bhide Special Report : अश्विनी भिंडेंना शिवसेनेकडून टार्गेट, भाजप-ठाकरे गटाचा एकच सूर
