WT20 WC Final: ऑस्ट्रेलिया सातव्यांदा ठरला चॅम्पियन, इंग्लंडचा पराभवImage Credit source: ICC Twitter
वुमन्स टी20 वर्ल्डकप स्पर्धेच्या जेतेपदावर अखेर ऑस्ट्रेलियाने मोहोर उमटवली आहे. अंतिम सामन्यात ऑस्ट्रेलियाचा सामना इंग्लंडशी झाला. या सामन्यात नाणेफेकीचा कौल ऑस्ट्रेलियाच्या बाजूने लागला आणि प्रथम गोलंदाजी स्वीकारली. हा निर्णय योग्यच ठरला असंच म्हणावं लागेल. कारण ऑस्ट्रेलियाने इंग्लंडला 150 धावांवर रोखलं. इंग्लंडने 20 षटकात 4 गडी गमवून 150 धावा केल्या आणि विजयासाठी 151 धावांचं आव्हान दिलं. हे आव्हान ऑस्ट्रेलियाने सहज गाठलं. ऑस्ट्रेलियाने 3 गडी गमवून दिलेलं आव्हान गाठलं. यासह वुमन्स टी20 वर्ल्डकप स्पर्धेच्या इतिहासात सातव्यांदा जेतेपदावर नाव कोरलं.
ऑस्ट्रेलियाचा डाव
इंग्लंडने विजयासाठी दिलेल्या 151 धावांचा पाठलाग करताना ऑस्ट्रेलियाला 17 धावांवर पहिला धक्का बसला. जॉर्जिया व्होल 9 धावा करून तंबूत परतली. तर बेथ मूनी आणि फोबी लिचफिल्ड यांनी आश्वासक भागीदारी केली. या दोघांनी दुसऱ्या विकेटसाठी इंग्लंडला चांगलंच झुंजवलं. दुसऱ्या विकेटसाठी 49 चेंडूत 81 धावांची भागीदारी केली. फोबी लिचफिल्ड 35 चेंडूत 48 धावा करून बाद झाली. बेथ मूनी 49 चेंडूत 64 धावांची खेळी करून बाद झाली.
इंग्लंडचा डाव
अंतिम सामन्यात इंग्लंडची सुरूवात काही खास झाली नाही. एमी जोन्स आणि डॅनी वायट-हॉज हे आघाडीचे फलंदाज एकेरी धावांवर बाद झाले. एमी जोन्सने 6 चेंडू 6 धावा, तर डॅनी वायट-हॉजने 9 चेंडू 8 धावा करून बाद झाली. त्यानंतर नॅट सायव्हर ब्रंट आणि एलिस कॅप्सी यांनी डाव सावरला. तिसऱ्या विकेटसाठी 35 धावांची भागीदारी केली. एलिक कॅप्सी 23 धावा करून तंबूत परतली. तर हेदर नाइट काही खास करू शकली नाही. तिचा डावही 2 धावांवर आटोपला. त्यानंतर फ्रेया कॅम्पने 28 चेंडूत 1 षटकार आणि 4 चौकाराच्या मदतीने नाबाद 44 धावा केल्या. तर नॅट सायव्हर ब्रंटने 53 चेंडूत नाबाद 58 धावांची खेळी केली. ऑस्ट्रेलियाकडून किम गार्थ, लुसी हॅमिल्टन, सोफी मोलिनेक्स आणि एनाबेल सदरलँड यांनी प्रत्येकी एक विकेट घेतली.
बक्षिसाची रक्कम
आयसीसी वुमन्स टी20 वर्ल्डकप स्पर्धेच्या अंतिम फेरीत बक्षिसाची रक्कम वाढवली आहे. त्यामुळे जेतेपद मिळवणाऱ्या ऑस्ट्रेलियन संघाला 2.34 मिलियन डॉलर म्हणजेच जवळपास 22 कोटी रुपये मिळाले आहेत. तर उपविजेत्या इंग्लंड संघाची पराभूत झाल्यानंतरही चांदी झाली आहे. इंग्लंड 1.17 मिलियन डॉलर म्हणजेच जवळपास 11 कोटी रोख रक्कम मिळाले आहेत.
