‘राम मंदिरासाठी मी दिलेली देणगी परत हवी’, माजी मुख्यमंत्र्यांनी दिली कोर्टात जाण्याची धमकी; गैरव्यवहार प्रकरणात खळबळजनक वळण | राष्ट्रीय बातम्या

दिग्विजय सिंह यांनी दावा केला की राम मंदिराच्या उभारणीसाठी त्यांनी 1 लाख 11 हजार रुपयांची देणगी दिली होती. मात्र त्या देणगीचा कथित अपहार झाल्याचा आरोप करत त्यांनी ती रक्कम परत मिळावी, यासाठी अयोध्येतील न्यायालयात दावा दाखल करण्याचा निर्णय घेतला आहे.

राम मंदिरासाठी देणगी गोळा केली जात असताना तत्कालीन मुख्यमंत्री शिवराज सिंह चौहान यांनी 1 लाख रुपयांची देणगी दिली होती. त्यापेक्षा अधिक देणगी द्यावी, या उद्देशाने आपण 1 लाख 11 हजार रुपये दिले होते,असे दिग्विजय सिंह म्हणाले.

दिग्विजय सिंह यांनी श्री रामजन्मभूमी तीर्थ क्षेत्र ट्रस्टचे सरचिटणीस चंपत राय यांच्यावरही आरोप केले. आणीबाणीच्या काळात चंपत राय नागपूरला गेले आणि तेथे प्रचारक झाले. त्यानंतर ते विश्व हिंदू परिषदेत पुढे आले. अशोक सिंघल यांनी त्यांना सोबत घेतले. त्यानंतर पुन्हा देणगी संकलन सुरू झाले. न्यायालयाच्या निर्णयानंतर ट्रस्टची स्थापना झाली आणि चंपत राय यांच्याकडे त्याचे व्यवस्थापन सोपविण्यात आले. या ट्रस्टमध्ये कोणतेही महात्मा किंवा शंकराचार्य नाहीत.

चंपत राय यांच्याकडे ट्रस्टच्या व्यवस्थापनाची जबाबदारी होती. त्यांनी 10 ते 15 हजार रुपये मासिक वेतनावर कर्मचारी नियुक्त केले. मात्र तरीही दररोज जमा होणाऱ्या देणगीतून 10 ते 20 टक्के रक्कम रोख स्वरूपात गायब होत होती. या प्रकारात काही बँक अधिकारी आणि कर्मचारीही सहभागी होते. हा आमच्या श्रद्धेवर झालेला अत्यंत मोठा आघात आहे, असा दिग्विजय सिंह यांनी आरोप केला.

तेव्हापासून देणगी चोरीचे प्रकार सुरू झाले. आम्हीही देणगी दिली. गावागावातून राम मंदिरासाठी विटा पाठविण्यात आल्या, पण आजतागायत त्यांचा पत्ता लागलेला नाही. लोकांमध्ये भ्रम निर्माण करून, धर्माचा वापर करून काही लोक पैसा कमावत आहेत. त्या पैशातून मते विकत घेतली जातात, आमदार आणि खासदार विकत घेतले जातात. ही खरेदी आमच्यासारख्या श्रद्धेने देणगी देणाऱ्या लोकांच्या पैशातून होत आहे. आता ही देणगी चोरी नेमकी कोण करत आहे, हा प्रश्न उपस्थित होतो.