दगडी खाणीत 40 फूट उंचीवरून महाकाय दगड अंगावर कोसळला; रोजंदारीवरील आठ कामगार जाग्यावर गतप्राण, जखमीचा आकडा अजूनही निश्चित नाही

Stone Quarry Accident: कर्नाटकातील बंगळूर दक्षिण तालुक्यात एका दगडाच्या खाणीत 40 फूट उंचीवरून दगड कोसळल्याने बिहारमधील आठ मजुरांचा मृत्यू झाला. अपघाताच्या वेळी खाणीत सुमारे १८ मजूर काम करत होते. या अपघातात इतर अनेक मजूर जखमी झाले आहेत. जखमींना उपचारासाठी एका खासगी रुग्णालयात दाखल करण्यात आले आहे. तथापि, जखमींची नेमकी संख्या अद्याप निश्चित झालेली नाही. घटनेची माहिती मिळताच पोलीस आणि बचाव पथके घटनास्थळी दाखल झाली आणि त्यांनी बचावकार्य सुरू केले. ढिगारा हटवण्याचे काम सुरू आहे. ढिगाऱ्याखाली आणखी कोणी मजूर गाडले गेले आहेत का, याचाही तपास सुरू आहे.

BREAKING NEWS- At least seven workers from #Bihar were killed after a massive rock collapsed at a stone quarry in #Karnataka‘s #Bengaluru. According to police, the tragedy happened early in morning at Madapattana in Bengaluru South Taluk pic.twitter.com/KNT7EJt4yu

— Siraj Noorani (@sirajnoorani) July 2, 2026

क्रशर साइटवर रोजंदारीवर काम करणारे मजूर 

पोलिसांच्या माहितीनुसार, सर्व मृत व्यक्ती स्टोन क्रशर साइटवर रोजंदारीवर काम करणारे मजूर होते. सर्व मृत व्यक्ती बिहारचे रहिवासी होते. त्यांच्या कुटुंबीयांना माहिती देण्याची प्रक्रिया सुरू करण्यात आली आहे. पोलिसांनी या घटनेचा तपास सुरू केला आहे. दगड कोसळण्याचे कारण आणि खाणीतील सुरक्षा मानकांचे पालन झाले आहे की नाही, याचा तपास केला जात आहे. एक्स्कॅव्हेटर चालवणाऱ्या परशुराम यांनी सांगितले की, ते घटनास्थळी पोहोचून काम सुरू करण्यासाठी मशीन सुरू करताच डोंगराचा एक भाग कोसळला. ते म्हणाले, “मी खात्रीने सांगू शकत नाही, पण त्यावेळी खाली सुमारे 18 लोक काम करत होते. ढिगाऱ्याखाली गाडल्या गेलेल्या चार जणांना तातडीने रुग्णालयात दाखल करण्यात आले आहे, तर बाकीचे अजूनही अडकले आहेत. हा अपघात इतका अचानक घडला की कामगारांना सावरण्याची संधीच मिळाली नाही.”

कर्नाटकच्या मुख्यमंत्र्यांनी शोक व्यक्त केला

कर्नाटकचे मुख्यमंत्री डी. के. शिवकुमार यांनी या अपघातावर शोक व्यक्त केला. त्यांनी सोशल मीडियावर लिहिले की, खाण चालकांची जबाबदारी आहे की त्यांनी तेथे काम करणाऱ्या कामगारांच्या सुरक्षेची खात्री करावी. ते म्हणाले की, नियमांचे उल्लंघन करणाऱ्या खाणींवर सरकार कठोर आणि योग्य कारवाई करेल. त्यांनी अपघातात प्राण गमावलेल्या कामगारांना श्रद्धांजली वाहिली आणि जखमींना लवकरात लवकर बरे वाटावे अशी सदिच्छा व्यक्त केली.

इतर महत्वाच्या बातम्या