आशियाई खेळ जपानमधील आयची-नागोया येथे 19 सप्टेंबर ते 4 ऑक्टोबर दरम्यान आयोजित केले जातील. भारतीय संघ गतविजेता म्हणून या स्पर्धेत प्रवेश करेल. संघाने 2023 मध्ये चीनमधील हांगझू येथे सुवर्णपदक जिंकले होते. आशियाई खेळांमध्ये पुरुष आणि महिला दोन्ही गटांमध्ये टी-20 फॉरमॅटमध्ये क्रिकेट खेळले जाते. इंग्लंडमध्ये नुकत्याच पार पडलेल्या महिला टी-20 विश्वचषक 2026 मध्ये भारतीय संघाचा प्रवास गट फेरीतच संपला. रविवारी ऑस्ट्रेलियाकडून पराभव पत्करल्यानंतर संघ स्पर्धेतून बाहेर पडला. या कामगिरीमुळे 37 वर्षीय हरमनप्रीतच्या कर्णधारपदावर प्रश्नचिन्ह निर्माण झाले आहे, जिच्या नेतृत्वाखाली भारताने गेल्या वर्षी महिला एकदिवसीय विश्वचषक जिंकला होता. तर आता या आशियाई स्पर्धेसाठी भारताचा संघ जाहीर झाला आहे. यासाठी कर्णधार म्हणून कोणाचि निवड झाली आहे ते पाहा…
आयसीसी महिला टी-20 विश्वचषक 2026 मध्ये खराब कामगिरी करूनही, बीसीसीआयने भारतीय महिला क्रिकेट संघाची कर्णधार हरमनप्रीत कौरवर आपला विश्वास कायम ठेवला आहे. जपानमध्ये होणाऱ्या 2026 च्या आशियाई खेळांसाठी 15 सदस्यीय भारतीय महिला संघाची घोषणा करण्यात आली असून, हरमनप्रीत कौर संघाचे नेतृत्व करणार आहे. स्मृती मंधाना आशियाई खेळांसाठी भारतीय महिला संघाची उपकर्णधार म्हणून कायम राहील. विश्वचषक संघातून केवळ यष्टीरक्षक-फलंदाज यास्तिका भाटियाला वगळण्यात आले आहे. तिच्या जागी जी. कमलिनीचा संघात समावेश करण्यात आला आहे. विश्वचषकादरम्यान दुखापतीमुळे बाहेर असलेली अष्टपैलू खेळाडू श्रेयंका पाटीलचा संघात समावेश करण्यात आला आहे, परंतु तिचा सहभाग तिच्या तंदुरुस्तीवर अवलंबून असेल. मंधाना, शेफाली वर्मा, जेमिमा रॉड्रिग्स आणि रिचा घोष फलंदाजीत हरमनप्रीतला साथ देतील. दीप्ती शर्मा, रेणुका सिंग, श्री चरणी, अरुंधती रेड्डी आणि नंदिनी शर्मा गोलंदाजीची जबाबदारी सांभाळतील.
महिला टी-20 विश्वचषकातील भारताची कामगिरी चढ-उतारांनी भरलेली होती. संघाने पाकिस्तान, बांगलादेश आणि नेदरलँड्सविरुद्ध सहज विजय मिळवला, परंतु दक्षिण आफ्रिका आणि ऑस्ट्रेलियाकडून पराभव पत्करल्यामुळे स्पर्धेतून बाहेर पडला. गट टप्प्यातून बाहेर पडूनही, स्पर्धेतील सर्वोच्च मानांकित आशियाई संघ म्हणून संघाने 2028 च्या लॉस एंजेलिस ऑलिम्पिकसाठी पात्रता मिळवली.
आशियाई क्रीडा स्पर्धा 2026 साठी भारतीय महिला संघ:
हरमनप्रीत कौर (कर्णधार), स्मृती मंधाना (उपकर्णधार), शेफाली वर्मा, जेमिमा रॉड्रिग्स, दीप्ती शर्मा, रिचा घोष, जी. कमलिनी, भारती फुलमाली, श्री चरणी, रेणुका ठाकूर, क्रांती गौड, अरुंधती रेड्डी, श्रेयंका पाटील, राधा यादव, नंदिनी शर्मा.
