Last Updated:
खासदार सुप्रिया सुळे यांची लाडकी लेक रेवती सुळेच्या शाही लग्नसोहळ्याला सुनेत्रा पवार आणि पार्थ पवार यांच्यासोबतच लग्नमंडपात एन्ट्री घेतलेल्या एका चेहऱ्याने सगळ्यांचच लक्ष वेधून घेतलं आहे.
मुंबई: राष्ट्रवादी काँग्रेसचे सर्वेसर्वा शरद पवार यांची नात आणि खासदार सुप्रिया सुळे यांची लाडकी लेक रेवती सुळे हिचा शाही विवाहसोहळा आज मुंबईतील एका अलिशान पंचतारांकित हॉटेलमध्ये अत्यंत दिमाखात पार पडला. भाजप आमदार आणि प्रसिद्ध उद्योगपती अरुण लखानी यांचे सुपुत्र सारंग लखानी यांच्यासोबत रेवतीने लग्नगाठ बांधली.
‘विश्वराज ग्रुप’चे बिझनेस एम्पायर सांभाळणारे सारंग हे उद्योगपती असण्यासोबतच उत्तम बॅडमिंटनपटूही आहेत. या हाय-प्रोफाईल लग्नाला देश-विदेशातील दिग्गज राजकारणी, उद्योगपती आणि बॉलिवूड स्टार्सनी हजेरी लावली होती. मात्र, या गराड्यात एका चेहऱ्याने सर्वांचेच लक्ष वेधून घेतले. ती म्हणजे थेट सुनेत्रा पवार आणि पार्थ पवार यांच्यासोबतच लग्नमंडपात एन्ट्री घेतलेली काश्मिरी सुंदरी कायनात धर.
महाकाल दर्शन ते थेट बारामती… कोण आहे कायनात?
पवार कुटुंबाच्या या कौटुंबिक सोहळ्यात कायनात धर ज्या पद्धतीने अजितदादांच्या कुटुंबीयांसोबत अगदी सावलीसारखी वावरताना दिसली, त्यामुळे राजकीय वर्तुळात पुन्हा एकदा चर्चेने चांगलाच जोर धरला आहे. मूळची काश्मीरची असलेली आणि सध्या दिल्लीत राहणारी कायनात गेल्या काही काळापासून पवार कुटुंबाच्या वर्तुळात सातत्याने दिसून येत आहे. काही महिन्यांपूर्वी पार्थ पवार आणि कायनात मध्य प्रदेशातील प्रसिद्ध महाकाल मंदिरात एकत्र पूजा करताना दिसले होते, ज्याचे फोटो इंटरनेटवर तुफान व्हायरल झाले होते.
फक्त आनंदाच्या सोहळ्यातच नाही, तर पवार कुटुंबाच्या कठीण काळातही कायनात त्यांच्यासोबत खंबीरपणे उभी राहिली आहे. ज्येष्ठ नेते अजित पवार यांच्या दुःखद निधनानंतर ती थेट बारामतीत सांत्वनासाठी पोहोचली होती. वरळीतील शोकसभेला आणि दशक्रिया विधीलाही तिची उपस्थिती होती. आता थेट रेवतीच्या लग्नात पार्थ पवारांसोबत तिची ही ग्रँड एन्ट्री पाहून अनेकांच्या भुवया उंचावल्या आहेत. अद्याप तिच्या आणि पवार कुटुंबाच्या नात्याबद्दल कोणतीही अधिकृत माहिती समोर आलेली नसली, तरी ती अजितदादांच्या कुटुंबाच्या खूप जवळची मानली जात आहे.
रेवती सुळे यांच्या लग्नात दिग्गजांची हजेरी
रेवती सुळे यांच्या या लग्नसोहळ्यात केवळ राजकीय नाही, तर बिझनेस आणि ग्लॅमर वर्ल्डमधील अनेक मान्यवर पाहायला मिळाले. शरद पवारांसह जम्मू-काश्मीरचे नेते ओमर अब्दुल्ला, कनिमोझी, जयंत पाटील, जितेंद्र आव्हाड आणि रोहित पवार वऱ्हाडी म्हणून मिरवत होते. तसेच बॉलिवूडचा बादशाह शाहरुख खानने स्टेजवर डान्स करून लग्नात रंगत आणली, तर महानायक अमिताभ बच्चन यांनी पत्नी जया बच्चन यांच्यासह नवविवाहित जोडप्याला आशीर्वाद दिला. मुकेश अंबानी, अनिल अंबानी आणि गौतम अदानी यांनीही सहकुटुंब हजेरी लावून या सोहळ्याची शान वाढवली.
Mumbai,Maharashtra
लग्न रेवतीचं पण ती सगळ्यांच लक्ष वेधून गेली, पार्थ पवारसोबत आलेली काश्मिरी तरुणी कोण? VIDEO VIRAL
