‘मैं कौन हूं, तू जानता नहीं, कुर्ला में..’ मुलगा आणि आईवर जीवघेणा हल्ला, मिरारोडमधील घटना | मुंबई बातम्या (Mumbai News)

पोलिसांनी दिलेल्या माहितीनुसार, मोहम्मद शफात शहबाज उस्मानी (वय 21) हा मित्रासोबत बर्गमन स्कूटरवरून फिरून आपल्या सोसायटीत परतला होता. स्कूटर पार्क करत असताना समोरील मेविश टॉवरमध्ये राहणाऱ्या सुलतान नासिर खान याने “येथे गाडी पार्क करू नको, ही जागा आमची आहे,” असं म्हणत वाद घातला. यावेळी त्याने शफातच्या कानशिलात लगावली. त्याच्यासोबत असलेल्या एका अनोळखी तरुणाने शफातला ढकलून खाली पाडलं. त्यानंतर दोघांनी लाथाबुक्क्यांनी आणि ठोसे मारून बेदम मारहाण केली. मारहाण सुरू असताना सुलतानने “मैं कौन हूं, तू जानता नहीं… कुर्ला में जाकर पूछ लेना, तेरी कुंडली निकाल दूंगा,” अशी धमकी देत दहशत निर्माण केल्याचा आरोपही फिर्यादीने केला आहे.

जखमींना प्रथम शासकीय रुग्णालयात उपचारासाठी नेण्यात आलं. त्यानंतर पुढील उपचारासाठी काशिमीरा येथील खासगी रुग्णालयात दाखल करण्यात आले असून दोघांवर उपचार सुरू आहेत. या प्रकरणी मोहम्मद शफात उस्मानी यांच्या तक्रारीवरून काशिमीरा पोलिसांनी सुलतान नासिर खान, नासिर खान, अल्तमश खान आणि एका अनोळखी आरोपीविरुद्ध भारतीय न्याय संहिता (BNS) 2023 मधील कलम 74, 115(2), 351(2), 352 आणि 3(5) अन्वये गुन्हा दाखल केला आहे. या प्रकरणाचा अधिक तपास पोलीस करत आहे.