अहिल्यानगर : महापालिका निवडणुकांपूर्वी पुण्यात (Pune) आंदेकर टोळीत झालेल्या मारहाणीच्या घटनांमध्ये हत्यासारखे गंभीर गुन्हे दाखल झाले आहेत. त्यामुळे, आंदेकर (Andekar) टोळीतील प्रमुख सध्या तुरुंगात असले तरी त्यांची टोळी जिल्ह्यात आणि शेजारील जिल्ह्यात सक्रीय असल्याचं दिसून येत आहे. एकीकडे कारागृहाच्या भिंतींआड बसूनही आंदेकर टोळी पुणे शहरात सक्रिय असल्याचे धक्कादायक वास्तव समोर आले आहे. टोळीच्या म्होरक्यांकडून पूर्ववैमनस्यातून शहरात हत्या आणि हत्येचा प्रयत्न केल्याच्या गंभीर घटना पोलीस तपासात निष्पन्न झाल्या आहेत. त्यातच, आता अहिल्यानगरमधून (Ahilyanagar) आंदेकर टोळीच्या 5 जणांना पोलिसांनी अटक करुन त्यांच्याकडून शस्त्रसाठी जप्त केला आहे.
आंदेकर टोळी तुरुंगातूनही सक्रीय असल्याचे समोर आल्यानंतर पुणे शहराचे पोलीस आयुक्त अमितेश कुमार यांनी राज्याच्या कारागृह प्रशासनाला एक पत्र लिहिले आहे. या पत्राद्वारे आंदेकर पिता-पुत्रासह टोळीतील प्रमुख गुन्हेगारांवर कारागृहातच कडक निर्बंध घालण्याची मागणी केली आहे. दुसरीकडे कुविख्यात आंदेकर टोळीतील 5 जणांना अहिल्यानगर स्थानिक गुन्हे शाखेच्या पोलिसांनी अटक केली आहे. शहरातील मिरावली पहाडच्या पायथ्याशी स्थानिक गुन्हे शाखेच्या पोलिसांनी ही कारवाई केली. दरोड्याच्या तयारीत असतांना स्थानिक गुन्हे शाखेच्या पोलिसांनी 5 जणांना बेड्या ठोकल्याने दरोड्याचा मोठा कट उधळून लावण्यात पोलिसांना यश आलं आहे. पोलिसांनी अटक केलेल्या आरोपींत मुश्ताक शेख, विराट मेहंदळे, समर्थ माडळकर, समर्थ दूधभाते, आणि आकाश पवार या आरोपींचा समावेश आहे….
10 पिस्टल, 10 जिवंत काडतुसे जप्त
पोलिसांनी आरोपीकडून 4 पिस्टल, 10 जिवंत काडतूसे, 1 कोयता,1 चाकूसह एकूण 2 लाख 76 हजारांचा मुद्देमाल पोलिसांनी जप्त केला आहे. अटक केलेल्या आरोपींपैकी समर्थ माडळकर आणि समर्थ दूधभाते या दोघांवर पुणे शहरात खुनाचा प्रयत्न, मकोका, शस्त्र बागळने यांसह अनेक गुन्हे दाखल आहेत.
सूर्यकांत बंडू आंदेकर धुळे कारागृहात
सध्या आंदेकर टोळीचा मुख्य आरोपी सूर्यकांत उर्फ बंडू आंदेकर हा धुळे येथील जिल्हा कारागृहात बंदिस्त आहे. तर त्याचा मुलगा कृष्णा आंदेकर हा नंदुरबार येथील कारागृहात आहे. या दोघांवरही खंडणी गोळा करणे (Extortion) आणि खून असे अनेक गंभीर गुन्हे दाखल आहेत. या गंभीर स्वरूपाच्या गुन्ह्यांमुळे त्यांच्यावर ‘महाराष्ट्र संघटित गुन्हेगारी नियंत्रण कायदा’ म्हणजेच ‘मकोका’ (MCOCA) अंतर्गत कारवाई करण्यात आली असून ते न्यायालयीन कोठडीत आहेत. कारागृहातून सुरू असलेली ही गुन्हेगारी मोडीत काढण्यासाठी आता पुणे पोलीस ॲक्शन मोडमध्ये आले आहेत.
हेही वाचा
आणखी वाचा
