पहाटेची वेळ, निर्मनुष्य रस्ता अन् अचानक आडवी आली दुचाकी; धारदार हत्यार गळ्याला लावून.. पुण्यात धक्कादायक घटना | पुणे बातम्या (Pune News)

याप्रकरणी विकास रामचंद्र सकट (वय ४४, रा. मानाजीनगर, नऱ्हे, पुणे) यांनी आंबेगाव पोलीस ठाण्यात फिर्याद दिली आहे. पोलिसांनी दिलेल्या माहितीनुसार, विकास हे पहाटेच्या सुमारास आपल्या दुचाकीवरून घरी जात होते. ते संतोषनगर येथील डिलाइट बेकरीच्या जवळ आले असता, एका दुचाकीवरून आलेल्या दोन अज्ञात तरुणांनी त्यांचा रस्ता अडवला.

काही समजण्याच्या आत, दुचाकीवरील एकाने विकास यांच्यावर थेट धारदार लोखंडी हत्यार उगारले आणि धमकी दिली. ते भीतीच्या छायेत असतानाच, दुसऱ्या नराधमाने त्यांच्या खिशात हात घालून ६ हजार रुपयांची रोकड जबरदस्तीने हिसकावून घेतली. विकास यांना धक्का देऊन दोघेही दुचाकीवरून सुसाट वेगाने पसार झाले.

भररस्त्यात झालेल्या या लुटीनंतर पीडित विकास सकट यांनी तात्काळ पोलीस ठाणे गाठून आपबिती सांगितली. घटनेचे गांभीर्य ओळखून आंबेगाव पोलिसांनी तातडीने तपास पथके रवाना केली. तांत्रिक पुरावे आणि गुप्त बातमीदारांच्या मदतीने पोलिसांनी मानव संदीप अडागळे (वय २३, रा. शनिनगर, जांभुळवाडी रस्ता, आंबेगाव खुर्द) आणि रेहान परवेज कुरेशी (वय १८, रा. इंद्रायणीनगर, टेल्को कॉलनी, जांभुळवाडी रस्ता) या दोघांना बेड्या ठोकल्या आहेत.

आरोपींनी लूटमारीसाठी वापरलेली दुचाकी आणि धारदार हत्यार जप्त करण्याची प्रक्रिया सुरू आहे. याप्रकरणी आंबेगाव पोलीस ठाण्यात नवीन कायद्यानुसार भारतीय न्याय संहिता (BNS) कलम ३०९(४), आर्म्स ॲक्ट कलम ४(२५) तसेच महाराष्ट्र पोलीस कायद्याच्या विविध कलमांनुसार गुन्हा दाखल करण्यात आला आहे. पहाटेच्या वेळी प्रवास करणाऱ्या नागरिकांनी सतर्क राहावे, असे आवाहन पोलिसांनी केले आहे.