ॲमेझॉन प्राइम व्हिडिओवरील लोकप्रिय वेब सीरिज ‘पंचायत’ च्या चारही सीझनला प्रेक्षकांचा जबरदस्त प्रतिसाद मिळाला आहे. आता या मालिकेच्या पाचव्या सीझनची प्रेक्षक आतुरतेने वाट पाहत आहेत. या मालिकेतील प्रत्येक कलाकाराने आपल्या दमदार अभिनयाच्या जोरावर प्रेक्षकांच्या मनात वेगळी ओळख निर्माण केली आहे. त्यापैकी आमदार चंद्रकिशोर सिंह यांची भूमिका साकारणारे अभिनेते पंकज झा सध्या एका व्हायरल फोटोमुळे चर्चेत आले आहेत.
पंकज झा यांनी त्यांच्या अधिकृत इन्स्टाग्राम अकाउंटवर एक फोटो शेअर केला आहे. या फोटोत ते रस्त्याच्या कडेला बसून भाजीपाला खरेदी करताना दिसत आहेत. त्यांच्या समोर टोमॅटो, काकडी, दुधी भोपळा यांसारख्या विविध भाज्या ठेवलेल्या आहेत आणि ते त्यातून भाजी निवडताना दिसतात. विशेष म्हणजे, या फोटोसोबत त्यांनी कोणतेही कॅप्शन दिलेले नाही. त्यामुळे हा फोटो नेमका कधीचा आहे किंवा कोणत्या प्रसंगी काढण्यात आला आहे, याबाबत कोणतीही माहिती उपलब्ध नाही. मात्र फोटो सोशल मीडियावर येताच चाहत्यांनी त्यावर मजेशीर प्रतिक्रिया देण्यास सुरुवात केली.
‘पंचायत’मधील आमदारजींची लोकप्रियता
पंकज झा यांच्या या फोटोवर सोशल मीडिया वापरकर्त्यांनी अनेक विनोदी प्रतिक्रिया दिल्या आहेत. एका चाहत्याने लिहिले, आमदारजी, लौकी घ्या बरं! तर दुसऱ्याने मजेशीर अंदाजात आमदारकी गेल्यानंतर गरीबी आली वाटतं अशी टिप्पणी केली. आणखी एका युजरने आमदारजींची ही काय अवस्था झाली? असे लिहिले, तर एका चाहत्याने आमदारजींना तर कोंबडीच जास्त आवडते अशी गंमतीशीर प्रतिक्रिया दिली.
लोकप्रिय वेब सीरिज ‘पंचायत’मध्ये पंकज झा यांनी आमदार चंद्रकिशोर सिंह यांची भूमिका साकारली आहे. मालिकेत त्यांनी नकारात्मक छटा असलेले पात्र रंगवले असले, तरी त्यांच्या अभिनयाने प्रेक्षकांची मने जिंकली आहेत. त्यांच्या संवाद आणि प्रभावी स्क्रीन उपस्थितीमुळे ते मालिकेतील सर्वाधिक चर्चेत राहणाऱ्या कलाकारांपैकी एक बनले आहेत.
‘पंचायत 5’ची उत्सुकता शिगेला
दरम्यान, ‘पंचायत’चे आतापर्यंत चार सीझन प्रदर्शित झाले आहेत आणि प्रत्येक सीझनला प्रेक्षकांचा भरभरून प्रतिसाद मिळाला आहे. मालिकेच्या पुढील भागाबाबत अद्याप अधिकृत घोषणा झालेली नसली, तरी पाचवा सीझन यावर्षाच्या अखेरीस प्रेक्षकांच्या भेटीला येऊ शकतो, अशी चर्चा रंगली आहे. त्यामुळे चाहत्यांमध्ये उत्सुकतेचे वातावरण निर्माण झाले आहे.
