जवळपास पाच वर्षांपूर्वी छोट्या पडद्यावर ‘कारभारी लयभारी’ ही मालिका सुरू झाली होती. यामध्ये अनुष्का सरकटे आणि निखिल चव्हाण या दोघांनी मुख्य भूमिका साकारल्या होत्या. याच मालिकेत काम करताना दोघं एकमेकांच्या प्रेमात पडले. निखिल आणि अनुष्काने लग्नगाठ बांधत आता आयुष्याची एक नवी सुरुवात केली आहे. नुकताच या दोघांचा अत्यंत थाटामाटाच लग्नसोहळा पार पडला. त्यापूर्वी हळद आणि संगीताच्या कार्यक्रमाचेही विविध फोटो, व्हिडीओ सोशल मीडियावर होत आहेत. असाच एक निखिलच्या उखाण्याचा व्हिडीओ सध्या चर्चेत आला आहे. संगीत समारंभात निखिलने अनुष्कासाठी भन्नाट उखाणा घेतला आहे. या उखाण्यात सध्या राज्यातील राजकारणात जे सुरू आहे, त्या मोठ्या घडामोडींचा उल्लेख आहे.
गेल्या काही दिवसांत राज्यात मोठ्या राजकीय घडामोडी घडल्या आहेत. उद्धव ठाकरे यांच्या शिवसेनेला (उबाठा) मोठा धक्का बसला आहे. कारण ठाकरे गटाचे नऊपैकी तब्बल सहा खासदार फुटून मुख्यमंत्री एकनाथ शिंदे यांच्या गटात सामील होण्याच्या मार्गावर आहेत. याचाच उल्लेख करत निखिलने अनुष्कासाठी उखाणा घेतला. “अलिकडच्या काळात फुटतायत आमदार, खासदार.. मी जरी असलो जबाबदार, तरी माझ्या आनंदासाठी अनुष्काच जबाबदार,” असा भन्नाट उखाणा निखिलने घेतला. यावेळी उपस्थितांनी टाळ्यांचा कडकडाट केला आणि हसत निखिलला दाद दिली.
लग्नाआधी निखिल आणि अनुष्कासाठी अभिनेते भरत जाधव आणि सुधीर निंबाळकर यांच्या कुटुंबीयांनी खास केळवणाचं आयोजन केलं होतं. या केळवणाला कमलाकर सातपुते, शर्मिला शिंदेही उपस्थित होते. केळवणाच्या कार्यक्रमातही निखिल आणि अनुष्का यांनी एकमेकांसाठी उखाणे घेतले. ‘लग्नसराई सुरू झाली लवकरच दारी येणार निखिलची वरात.. तू तू मी मी चे पुढील प्रयोग आता होणार आमच्याच घरात’, असा भन्नाट उखाणा अनुष्काने निखिलसाठी घेतला होता. त्यानंतर निखिलनेही अनुष्कासाठी खास उखाणा घेतला. ‘भरत सरांना सांगितलं, मी लग्न करतोय तर सर म्हणाले सही रे सही.. अनुष्का वचन दिले मी तुला कधी होणार नाही तू तू मी मी’, असं म्हणताच उपस्थितांनी टाळ्या वाजवल्या होत्या.
