बॉलिवूडमध्ये अनेक प्रेमकहाण्या गाजल्या. काहींना सुखांत लाभला तर काही प्रेमकहाण्या अपूर्ण राहिल्या. मात्र काही नात्यांची चर्चा काळाच्या ओघातही कमी होत नाही. अशाच सर्वाधिक चर्चेत राहिलेल्या प्रेमकहाण्यांपैकी एक म्हणजे अमिताभ बच्चन आणि रेखा यांची. या दोघांच्या ऑफस्क्रीन नात्याबाबत अनेक वर्षे चर्चा रंगली. त्याचबरोबर रुपेरी पडद्यावरही या जोडीने आपल्या अप्रतिम केमिस्ट्रीमुळे प्रेक्षकांची मने जिंकली.
1970 आणि 80 च्या दशकात अमिताभ बच्चन आणि रेखा ही हिंदी चित्रपटसृष्टीतील सर्वाधिक लोकप्रिय जोडी मानली जात होती. त्यांनी एकत्र साकारलेल्या अनेक चित्रपटांमधील गाणी आजही रसिकांच्या ओठांवर आहेत. रोमँटिक, भावनिक आणि उत्साहपूर्ण अशा विविध प्रकारची ही गाणी आजही तितक्याच आवडीने ऐकली जातात.
‘देखा एक ख्वाब’
1981 मध्ये प्रदर्शित झालेल्या सिलसिला या चित्रपटातील ‘देखा एक ख्वाब’ हे गाणे आजही सदाबहार मानले जाते. किशोर कुमार आणि लता मंगेशकर यांच्या सुरेल आवाजाने सजलेल्या या गाण्याचे शूटिंग काश्मीरच्या रम्य दऱ्या-खोऱ्यांमध्ये करण्यात आले होते.
‘सलाम-ए-इश्क मेरी जान’
1978 मध्ये प्रदर्शित झालेल्या मुकद्दर का सिकंदर चित्रपटातील ‘सलाम-ए-इश्क मेरी जान’ हे गाणे त्या काळातील सर्वाधिक लोकप्रिय गीतांपैकी एक ठरले. किशोर कुमार आणि लता मंगेशकर यांनी गायलेल्या या कव्वाली शैलीतील गाण्यात रेखा यांचा देखणा नृत्याविष्कार आणि अमिताभ बच्चन यांची प्रभावी स्क्रीन प्रेझेन्स विशेष लक्षवेधी ठरली.
‘ये कहाँ आ गए हम’
सिलसिला चित्रपटातील ‘ये कहाँ आ गए हम’ हे आणखी एक अविस्मरणीय गाणं आहे. या गाण्यात अमिताभ बच्चन यांनी स्वतःचा आवाज दिला असून त्यांना लता मंगेशकर यांची साथ लाभली आहे. अमिताभ यांच्या गंभीर आवाजासोबत रेखा यांच्या भावपूर्ण अभिनयाने या गाण्याला वेगळीच उंची मिळाली.
‘परदेसिया’
1979 मध्ये प्रदर्शित झालेल्या मिस्टर नटवरलाल चित्रपटातील ‘परदेसिया’ हे गाणेही प्रचंड लोकप्रिय झाले. किशोर कुमार आणि लता मंगेशकर यांच्या आवाजातील हे हलकेफुलके रोमँटिक गाणं आजही विविध कार्यक्रमांमध्ये आणि रेडिओवर आवर्जून ऐकायला मिळते.
‘रंग बरसे’
सिलसिला चित्रपटातील ‘रंग बरसे भीगे चुनरवाली’ हे गाणे होळीच्या सणाची ओळख बनले आहे. या गाण्याचे बोल हरिवंश राय बच्चन यांनी लिहिले असून अमिताभ बच्चन यांनी स्वतः हे गाणे गायले आहे.
