'इंडियन आयडॉल' या शोच्या पहिल्या सिझनचा विजेता अभिजीत सावंत याने त्याच्या पत्नीच्या वाढदिवशी तिला सर्वांत मोठी भेट दिली आहे. त्याचे फोटो त्याने सोशल मीडियावर पोस्ट केले आहेत. अभिजीतने पत्नी शिल्पाला थेट नवीन घरच भेट म्हणून दिलं आहे.
डिसेंबर 2007 मध्ये अभिजीतने त्याची बालमैत्रीण शिल्पाशी लग्न केलं. या दोघांना दोन मुली आहेत. शिल्पाने सुरुवातीला अभिजीतचं प्रपोजल नाकारलं होतं. नंतर ते दोघं पुन्हा एकत्र आले. लग्नानंतर 2008 मध्ये ही जोडी 'नच बलिये' या डान्स शोच्या चौथ्या सिझनमध्ये स्पर्धक म्हणून सहभागी झाले होते.
'इंडियन आयडॉल'पासून सुरु झालेला अभिजीतचा प्रवास पुढे अगणित गाण्यांचा महत्त्वपूर्ण भाग होण्यापर्यंत पोहोचला. त्याने कायम प्रेक्षकांची मन जिंकली आहेत. गायक ते बिग बॉसचा प्रवास आणि रिअॅलिटी शोमध्ये असलेला त्याचा वावर हा कायम चर्चेत तर राहिला, पण त्याच सोबतीने आजही प्रेक्षकांच्या ओठांवर अभिजीतची गाणी कायम असतात हे ही खरंच!
'मंगलाष्टक वन्स मोर'मधील 'सर सुखाची श्रावणी' हे गाणं असो किंवा काही दिवसांपूर्वी प्रदर्शित झालेली 'सखे गं साजणी', 'रुपेरी वाळूत' ही गाणी असो.. अभिजीतच्या आवाजाने प्रेक्षकांना मंत्रमुग्ध केलं आहे. त्याच्या आवाजाची जादू प्रेक्षकांना चित्रपटातही अनुभवयाला मिळत आहे.
अभिजीतने विविध मुलाखतींमध्ये आणि बिग बॉसच्या घरातही पत्नी शिल्पाचं तोंडभरून कौतुक केलं आहे. अभिजीतने अनेकदा तिच्याविषयीचं प्रेम व्यक्त केलं आहे. सोशल मीडियावरही तो पत्नीसोबतचे बरेच फोटो आणि व्हिडीओ पोस्ट करतो.
