मुंबई : मुंबई टी२० लीगचा चौथा सीझन नुकताच दिमाखात पार पडला. अंतिम सामन्यात ‘मुंबई साऊथ सेंट्रल मराठा रॉयल्स’ (MSC Maratha Royals) संघाने आर्क्स अंधेरी (ARCS Andheri) संघाचा ८ धावांनी पराभव करत सलग दुसऱ्यांदा जेतेपदाचा चषक उंचावला. मराठा रॉयल्सच्या या ऐतिहासिक यशात मधल्या फळीतील भरवशाचा फलंदाज चिन्मय सुतार याने अत्यंत मोलाचे योगदान दिले आहे. सेमी फायनल आणि फायनलमधील त्याच्या झुंजार अर्धशतकी खेळीच्या जोरावर मराठा रॉयल्सने पुन्हा एकदा मैदानावर वर्चस्व गाजवले.
यंदाच्या सीझनची आकडेवारी
चिन्मयने गेल्या वर्षीचा आपला उत्कृष्ट फॉर्म यंदाही कायम राखला. संपूर्ण स्पर्धेत त्याने मराठा रॉयल्ससाठी संकटमोचकाची भूमिका बजावली:
एकूण सामने : ७
एकूण धावा : २१२ (२ अर्धशतके)
सरासरी : ४२.४०
स्ट्राईक रेट : १२० च्या आसपास
फायनल सामन्यात आर्क्स अंधेरीविरुद्ध सुरुवातीला २ विकेट्स लवकर गेल्यावर चिन्मयने कर्णधार सिद्धेश लाडसोबत ६५ धावांची महत्त्वपूर्ण भागीदारी रचली. चिन्मयने ५२ चेंडूत ६१ धावांची संयमी आणि खेळी करत संघाला १५४ धावांच्या आव्हानात्मक धावसंख्येपर्यंत पोहोचवले.
बाद फेरीतील निर्णायक कामगिरी
चिन्मय सुतारने केवळ फायनलमध्येच नाही, तर सेमी फायनलमध्येही संघाला एकहाती विजय मिळवून दिला होता. नॉर्थ मुंबई पँथर्सविरुद्धच्या उपांत्य सामन्यात सुरुवातीला अवघ्या ५ धावांत २ विकेट्स पडल्या असताना त्याने ४९ चेंडूत नाबाद ६२ धावांची मॅचविनिंग खेळी खेळली होती. या सातत्यामुळे त्याला ‘बिग-मॅच प्लेयर’ म्हणून ओळखले जात आहे.
निवड समितीच्या रडारवर
गेल्या दोन सीझनमधील चमकदार कामगिरीमुळे चिन्मयने निवड समितीचे लक्ष वेधून घेतले आहे. यापूर्वी त्याची विजय हजारे करंडकासाठी मुंबईच्या संघात निवड झाली होती. परंतु, यंदाच्या दमदार कामगिरीनंतर त्याला विजय हजारे, सय्यद मुश्ताक अली टी२० आणि आगामी रणजी संघातही खेळण्याची मोठी संधी मिळण्याची दाट शक्यता वर्तवली जात आहे.
वडिलांकडून मिळाला क्रिकेटचा वारसा
चिन्मयला क्रिकेटचे बाळकडू घरातूनच मिळाले आहे. त्याचे वडील राजेश सुतार हे मुंबई क्रिकेटमधील मोठे नाव असून ते मुंबईकडून रणजी क्रिकेट खेळले आहेत आणि नामांकित प्रशिक्षकही आहेत. वडिलांच्या मार्गदर्शनाखाली तयार झालेल्या चिन्मयने आतापर्यंत क्रिकेट क्लब ऑफ इंडिया (CCI), टाटा स्पोर्ट्स क्लब आणि मुंबई कस्टम्स अशा नामांकित संघांचे प्रतिनिधित्व केले आहे. मुंबई टी२० लीगमधील या कामगिरीने त्याला आता मुंबईच्या मुख्य संघात स्थान मिळवण्यासाठी मजबूत दावेदार बनवले आहे.
ही बातमी वाचा:
IPL 2026 : राजस्थान रॉयल्सने पंजाब किंग्सचा घरच्या मैदानावर पराभव करत विजयीरथ रोखला
