Sonam Wangchuk on Dharmendra Pradhan Resignation : गेल्या २८ जूनपासून उपोषणाला बसलेले सामाजिक कार्यकर्ते सोनम वांगचुक (Sonam Wangchuk) यांनी अखेर आपले उपोषण मागे घेतले आहे. सोनम वांगचुक (Sonam Wangchuk) यांनी शुक्रवारी उपोषण सोडल्याची माहिती देत सांगितले की, आंदोलकांवर कोणतेही गुन्हे दाखल न करणे आणि ‘नीट’ (NEET) पेपर फुटी प्रकरणामुळे आत्महत्या केलेल्या पीडितांच्या कुटुंबांना भरपाई देणे, या मागण्यांवर सरकारने सहमती दर्शवली आहे. मात्र, शिक्षणमंत्री धर्मेंद्र प्रधान यांच्या राजीनाम्याबाबत सरकारने कोणताही तात्काळ शब्द दिलेला नाही.(Dharmendra Pradhan Resignation)
“२६ व्या दिवशी आनंदाची बातमी”; वांगचुक यांनी सांगितला घटनाक्रम
व्हिडिओमध्ये बोलताना वांगचुक (Sonam Wangchuk) म्हणाले, “२६ व्या दिवशी मी तुम्हाला एक विशेष बातमी सांगू इच्छितो. आता रात्रीचे साधारण १२:३० वाजत आहेत. काही वेळापूर्वीच केंद्रीय मंत्री जे. पी. नड्डा साहेब आणि जितेंद्र सिंह साहेब येथे आले होते. तसेच लडाखच्या ‘ॲपेक्स बॉडी’चे वरिष्ठ नेतेही उपस्थित होते.”(Sonam Wangchuk)
ते पुढे म्हणाले, “यापूर्वी विविध राजकीय पक्षांच्या सुमारे ६५ खासदारांनी येऊन आणि स्वाक्षऱ्या करून मला उपोषण मागे घेण्याची विनंती केली होती. तसेच, संसदेत ‘नीट’ पेपर फुटी आणि परीक्षा पद्धतीवर चर्चा केली जाईल, असे आश्वासन त्यांनी दिले. सरकारच्या वतीने आलेल्या मंत्र्यांनीही हेच आश्वासन दिले आहे.”(Sonam Wangchuk)
सोनम वांगचुक यांच्या प्रमुख मागण्या आणि सरकारची लेखी सहमती
आपल्या मागण्यांवर भाष्य करताना वांगचुक म्हणाले, “गेल्या दोन दिवसांपासून मला सरकारकडून स्पष्ट आणि लेखी आश्वासन हवे होते. यासाठी दोन दिवस गेले, त्यामुळे मला आणखी दोन दिवस उपोषणाला बसावे लागले. मी आणखी काही दिवस बसलो असतो, पण अखेर आज त्यांनी मला लेखी आश्वासन दिले आहे.”
त्यांनी दिलेल्या माहितीनुसार, दिल्लीतील जंतर-मंतर येथे निदर्शने करणाऱ्या आंदोलकांवर पोलीस गुन्हे दाखल करणार नाहीत, यावर सरकार तयार झाले आहे. याशिवाय २० जुलै रोजी झालेल्या मार्चमध्ये सहभागी झालेल्यांवरही कोणतीही कारवाई केली जाणार नाही. संसदेत पेपर फुटी आणि शिक्षण क्षेत्रातील सुधारांवर चर्चा करण्याचे आश्वासन सरकारने आधीच दिले आहे. तसेच, अलीकडेच झालेल्या ‘नीट’ पेपर फुटीमुळे आत्महत्या केलेल्या विद्यार्थ्यांच्या कुटुंबांना योग्य ती भरपाई देण्याबाबत सरकार विचार करत आहे.
धर्मेंद्र प्रधान यांचा राजीनामा होणार की नाही?
शिक्षणमंत्र्यांच्या राजीनाम्याबाबत बोलताना वांगचुक म्हणाले, “आता तुम्ही नक्कीच विचाराल की धर्मेंद्र प्रधान जी यांच्या राजीनाम्याचे काय झाले? पहिली गोष्ट म्हणजे, हे कधी होईल याबाबत ते मला सध्या तरी कोणतेही आश्वासन देऊ शकलेले नाहीत. मात्र, संसदेच्या सभागृहात यावर चर्चा नक्कीच होईल.”
ते पुढे म्हणाले, “आता माझ्यासमोर दोनच मार्ग होते. एक तर मी आठवडेन् आठवडे उपोषणाला बसून राहावे आणि कदाचित त्यातच माझा अंत व्हावा. परंतु, तुमच्यापैकीच हजारो लोक गेल्या दोन-तीन आठवड्यांपासून मला सांगत आहेत की, ‘तुमचा जीव महत्त्वाचा आहे, लढा पुढे नेण्यासाठी तुमचे जिवंत राहणे गरजेचे आहे.”
“यात सरकारचेच नुकसान”; वांगचुक यांचा टोला
राजीनाम्याच्या मुद्द्यावर आपले मत मांडताना वांगचुक म्हणाले, “आम्ही हे साध्य केले नाही, असे मी मानत नाही. मित्रांनो, माझे विचार थोडे वेगळे आहेत. जर त्यांनी राजीनामा दिला नाही, तर त्याने आपले किंवा मुलांचे नुकसान होणार नाही, उलट सरकारचेच नुकसान होईल. हा छोटासा मुद्दा न सोडवता सरकार स्वतःचेच नुकसान करून घेत आहे.”
ते पुढे म्हणाले, “जर त्यांनी राजीनामा दिला असता, तर त्यांचे हे सर्व नुकसान कधीच थांबले असते. त्यामुळे माझ्यासाठी हा मुद्दा सर्वात जास्त महत्त्वाचा नव्हता, याचे निवारण विविध मार्गांनी आपोआप होईल. माझ्यासाठी सर्वात महत्त्वाचे हे होते की, आपल्या मुलांवर कोणतेही खोटे गुन्हे दाखल होऊ नयेत.”
लडाखच्या परिस्थितीचा केला उल्लेख
आपल्या अनुभवाचा दाखला देत वांगचुक म्हणाले, “मी लडाखमध्ये पाहिले आहे की, एफआयआरच्या (FIR) फेऱ्यांमध्ये अडकून तरुणांचे आयुष्य आणि भविष्य कसे उद्ध्वस्त होते. आता आपल्या मुलांसोबत तसे काहीही होणार नाही, ही गोष्ट आम्ही सरकारकडून साध्य करून घेतली आहे, याचा मला आनंद आहे. तसेच मृत मुलांच्या कुटुंबांना योग्य भरपाई दिली जाईल, याचेही समाधान आहे. देशाच्या लोकशाहीच्या सर्वोच्च मंदिरात म्हणजेच संसदेत या मुद्द्यावर आणि जबाबदारीवर पूर्ण चर्चा होईल.” शेवटी सर्वांचे आभार मानताना ते म्हणाले, “या आंदोलनाला पाठिंबा दिल्याबद्दल मी तुम्हा सर्वांचे मनापासून आभार मानतो. जय हिंद!”
Sonam Wangchuk Hunger Strike : 26 दिवसांनंतर अखेर सोनम वांगचुक यांचं उपोषण मागे; मंत्री जेपी नड्डा आणि जितेंद्र सिंह यांच्या चर्चेनंतर निर्णय
