EPFO Interest Rate: 7 कोटी कर्मचाऱ्यांना लॉटरी! पीएफच्या 8.25 टक्के व्याजावर शिक्कामोर्तब, खात्यात व्याज जमा होणार कधी? – Marathi News | EPFO Interest Rate A windfall for 7 crore employees 8 and 25 percent PF interest rate approved—when will the interest be credited to accounts

EPFO Interest Rate 2026: केंद्रीय भविष्य निर्वाह निधी संघटना लवकरच कात टाकणार आहे. अनेक सेवा डिजिटल होणार आहेत. कर्मचाऱ्यांना लवकरच पीएफसंबंधी झटपट सुविधा मिळणार आहे. त्यांना एटीएम आणि युपीआय पद्धतीने पीएफ काढता येणार आहे. तर इतरही अनेक सुविधा प्राप्त करण्यात पूर्वी जे कार्यालयीन अडथळे येत होते, त्या अगदी काही सेंकदात मिळणार आहेत. तर त्याचवेळी पीएफ खातेदारांसाठी एक महत्त्वाची अपडेट समोर आली आहे. त्यांच्या खात्यात व्याजाची रक्कम जमा होणार आहे.

8.25 टक्के दराने व्याजाची रक्कम

आर्थिक वर्ष 2025-26 साठी केंद्र सरकारने 8.25 टक्के व्याजदर निश्चित केला आहे. या व्याजदराला केंद्र सरकारने मंजूरी दिली आहे. पीटीआय या वृत्त संस्थेने दिलेल्या माहितीनुसार, वित्त मंत्रालयाने ईपीएफओने निश्चित केलेल्या 8.25 टक्के व्याजदराला मंजूरी दिली आहे. आता या मंजूरीनंतर लवकरच ईपीएफओ सदस्यांच्या बँक खात्यात व्याजाची रक्कम जमा होणार आहे.

2 मार्च 2026 रोजी ईपीएफओच्या सेंट्रल बोर्ड ऑफ ट्रस्टीज(CBT) ने व्याजदर जाहीर केले होते. त्यानंतर मंजूरीसाठी हा प्रस्ताव केंद्रीय वित्त मंत्रालयाकडे पाठवण्यात आला होता. केंद्रीय कामगार आणि रोजगार मंत्री मनसूख मांडवीय यांच्या अध्यक्षतेखालील हा प्रस्ताव मंजूरीसाठी पाठवण्यात आला होता.

EPF योजना 1952 चा नियम 60 नुसार, व्याज दर मोजण्यासाठी एका निश्चित पद्धतीचा वापर करण्यात येतो. त्यानुसार व्याज दर सीबीटीनं निश्चित केल्यानंतर जमा करण्यात येते. मासिक चालू रक्कम, शिल्लकी आधारे ईपीएफवर व्याज जमा करण्यात येते. प्रत्येक आर्थिक वर्षाच्या अखेरच्या दिवसापासून ते लागू होतं. जर तुम्ही पीएफ खात्यातील रक्कम काढली तर, उरलेल्या रक्कमेवर व्याज मिळते.

कधी जमा होणार व्याजाची रक्कम?

सूत्रांच्या माहितीनुसार पीएफ खात्यात व्याजाची रक्कम याच महिन्यात जमा होण्याची शक्यता आहे. कामगार आणि रोजगार मंत्रालयाच्या निर्देशानुसार, 2025-26 या आर्थिक वर्षात 8.25 टक्के दराने व्याजाची रक्कम जमा होईल. व्याजाची रक्कम थेट पीएफ खातेदाराच्या खात्यात जमा होईल.

असा बदलत गेला व्याजदर

आर्थिक वर्ष 2024-25 साठी पीएफ रक्कमेवर 8.25 टक्के व्याजदर निश्चित करण्यात आला

तर 2023-24 साठी हाच व्याजदर म्हणजे 8.25 टक्के व्याजदर लागू होता

त्यापूर्वी 2022-23 मध्ये हा व्याजदर 8.15 टक्के इतका होता.

तर 2021-22 या वर्षात व्याजदरात मोठी कपात झाली. हा दर 8.10 टक्के इतका होता

2020-21 या आर्थिक वर्षात व्याजदर 8.5 टक्के असा होता