Last Updated:
Sachin Ahir: उद्धव ठाकरे यांचे निकटवर्तीय तसेच विश्वासू आमदार म्हणून ओळखले जाणारे सचिन अहिर यांनी शिवसेना शिंदे गटात प्रवेश केला असून त्यांना विधान परिषदेच्या उपसभापतीपदाची उमेदवारी देण्यात आली आहे.
मुंबई : शिवसेनेचे मुख्य नेते तथा उपमुख्यमंत्री एकनाथ शिंदे यांनी सहा खासदारांना गळाला लावल्यानंतर आता ऑपरेशन टायगरची दुसरी इनिंग सुरू झाली असून उद्धव ठाकरे यांना पहिला मोठा धक्का बसला आहे. उद्धव ठाकरे यांचे निकटवर्तीय तसेच विश्वासू आमदार म्हणून ओळखले जाणारे सचिन अहिर यांनी शिवसेना शिंदे गटात प्रवेश केला असून त्यांना विधान परिषदेच्या उपसभापतीपदाची उमेदवारी देण्यात आली आहे. सचिन अहिर यांच्या शिंदेसेनेतील प्रवेशाने एकनाथ शिंदे यांनी उद्धव ठाकरे यांना मोठा शह दिल्याची चर्चा आहे.
उद्धव ठाकरे यांच्या शिवसेनेतील नाराज नेत्यांना हेरून त्यांना शिवसेनेत पक्षप्रवेश देण्याचा झपाटा एकनाथ शिंदे यांच्याकडून सुरू आहे. लोकसभा आणि विधानसभा निवडणूक झाल्यानंतरच्या दीड वर्षांनी ऑपरेशन टायगर राबवून सहा खासदारांना गळाला लावण्याची किमया एकनाथ शिंदे यांनी साधली. त्यानंतर आता पुढचा टप्पा ‘आमदारांचा प्रवेश’ असे खुलेआमपणे एकनाथ शिंदे यांच्या वतीने सांगण्यात आले. ठाकरे फुटीरांच्या मतदारसंघात जाऊन तोंडसुख घेत असताना इकडे मुंबईत आदित्य ठाकरे यांचा मतदारसंघ ज्यांच्यामुळे सेफ होता, त्याच सचिन अहिर यांना फोडून एकनाथ शिंदे यांनी उद्धव ठाकरे यांना सर्वात मोठा धक्का दिला आहे.
Mumbai,Maharashtra
Jun 30, 2026 11:46 AM IST
