Pune Rain: पुणेकरांनो, घराबाहेर पडण्याआधी हे वाचाच; पुढील 72 तास महत्त्वाचे, पुण्यासह 24 जिल्ह्यांना ‘यलो अलर्ट’ | पुणे बातम्या (Pune News)

रविवारी सकाळी पुण्यात ढगाळ वातावरण होते, मात्र दुपारी दोनच्या सुमारास पावसाने जोरदार हजेरी लावली. शिवाजीनगर, स्वारगेट, डेक्कन, कोथरूड, कात्रज, औंध, येरवडा, कल्याणीनगर आणि सिंहगड रस्ता या भागात जोरदार सरी कोसळल्या. यामुळे रस्त्यांवर पाणी साचल्याने वाहतूक संथ गतीने सुरू होती आणि नागरिकांना वाहतूक कोंडीचा सामना करावा लागला.

शहरात रविवारी कमाल तापमान ३३ अंश सेल्सिअस तर किमान तापमान २३.८ अंश सेल्सिअस इतके नोंदविण्यात आले. सोमवारी (ता. २९) पुणे आणि परिसरात कमाल तापमान स्थिर राहण्याची शक्यता असून ते ३३ अंश सेल्सिअस तर किमान तापमान २४ अंश सेल्सिअसच्या आसपास राहील. आकाश मुख्यतः निरभ्र राहून दुपारी आणि सायंकाळी अंशतः ढगाळ राहण्याची शक्यता आहे. तसेच मेघगर्जना आणि विजांच्या कडकडाटासह हलक्या ते मध्यम स्वरूपाचा पाऊस पडू शकतो.