60 च्या दशकात हिंदी चित्रपटसृष्टीत पदार्पण करून आपल्या दमदार अभिनयाने आणि खलनायिकेच्या लक्षवेधी भूमिकांनी वेगळी ओळख निर्माण करणाऱ्या ज्येष्ठ अभिनेत्री बिंदू यांनी नुकत्याच एका मुलाखतीत आपल्या कारकिर्दीतील अनेक आठवणींना उजाळा दिला. या वेळी त्यांनी 1973 साली प्रदर्शित झालेल्या ‘जोशीला’ चित्रपटाच्या चित्रीकरणादरम्यान घडलेला एक रंजक प्रसंग सांगितला. त्यांच्या एका निर्णयामुळे तब्बल दोन तास शूटिंग थांबले होते, असा खुलासा त्यांनी केला.
‘जोशीला’ या चित्रपटात बिंदू यांच्यासोबत देव आनंद, हेमा मालिनी आणि राखी गुलजार यांसारखे दिग्गज कलाकार होते. या चित्रपटाचे दिग्दर्शन यश चोप्रा यांनी केले होते. युट्यूबर विकी लालवानी यांना दिलेल्या मुलाखतीत बिंदू यांनी सांगितले की, एका सीनसाठी त्यांना अचानक बिकिनी परिधान करण्यास सांगण्यात आले. मात्र, चित्रपटाच्या तयारीदरम्यान याबाबत त्यांना कोणतीही कल्पना देण्यात आली नव्हती.
त्या म्हणाल्या, ‘मी बिकिनी घालण्यासाठी तयार नव्हते. त्यामुळे मी जवळपास दोन तास शूटिंग थांबवून ठेवले. सेटवर पोहोचल्यानंतरच मला या सीनबद्दल समजले. मी यशजींना स्पष्टपणे सांगितले की, याची मला आधी कल्पना दिली असती तर बरे झाले असते.
यश चोप्रांनी दिला विश्वास
बिंदू यांनी सांगितले की, त्यांच्या संकोचाची जाणीव होताच यश चोप्रांनी त्यांना धीर दिला. त्यांनी सांगितले की, शक्य तितके पाण्यात राहूनच दृश्य चित्रीत केले जाईल आणि कॅमेऱ्यात फक्त बाजूचे व मागील अँगल्स वापरले जातील.
या प्रसंगात देव आनंद मात्र शांतपणे सर्व घडामोडी पाहत बसले होते. बिंदू म्हणाल्या, शूटिंग जवळपास दोन तास थांबले होते. त्या काळात देव आनंदजी काहीही बोलले नाहीत. ते काय विचार करत असतील, याचाच मी विचार करत होते. शेवटी बिंदू यांनी यश चोप्रांच्या आश्वासनावर विश्वास ठेवून ते सीन साकारले. चित्रीकरण पूर्ण झाल्यानंतर त्यांनी सिनेमॅटोग्राफरला सीन कसे दिसत आहे अशी विचारणा केली.
याबाबत त्या म्हणाल्या, त्यांनी मला सांगितले की, ‘काळजी करू नका, तुम्ही चांगल्या दिसत आहात. सीन अजिबात अश्लील वाटत नाही. त्यांच्या या शब्दांनंतर मला मोठा दिलासा मिळाला.
