Sharad Pawar MP Revolt : ठाकरे यांच्या शिवसेनेतील सहा खासदारांनी बंडखोरी केल्याने सध्या राज्याच्या राजकारणात एकच खळबळ उडालेली आहे. हे खासदार लवकरच उपमुख्यमंत्री एकनाथ शिंदे यांच्या पक्षात सामील होण्याची शक्यता आहे. हे बंड रोखण्याचा ठाकरे गटाकडून प्रयत्न करण्यात आला. परंतु सध्यातरी यात यश येण्याची शक्यता कमी असल्याचे बोलले जात आहे. कायदेशीर बाबी तपासून झाल्यानंतरच या बंडखोर खासदारांचा शिंदे गटातील प्रवेश जाहीर केला जाणार आहे. खासदारांनी बंड केल्यानंतर आता ठाकरे गटाकडून या खासदारांच्या अपात्रतेसाठी कायदेशीर मार्गांचा अवलंब केला जात आहे. विरोधी बाकावर असलेल्या ठाकरे गटाच्या शिवसेनेत या घडामोडी घडत असतानाच आता राज्याच्या राजकारणात खळबळ उडवून देणारी आणखी एक माहिती समोर आली आहे. सूत्रांच्या माहितीनुसार आता शरद पवार यांच्या पक्षातील काही खासदार हे उपमुख्यमंत्री सुनेत्रा पवार यांच्या संपर्कात आहेत.
सुनेत्रा पवार यांची अमित शाहांसोबत चर्चा
सूत्रांच्या माहितीनुसार शरद पवार यांच्या पक्षातही मोठी फूट पडू शकते. कारण शरद पवार यांच्या पक्षाचे काही खासदार हे उपमुख्यमंत्री सुनेत्रा पवार यांच्या संपर्कात असल्याचे सांगितले जात आहे. पडद्यामागे बऱ्याच घडामोडी घडत आहेत. सुनेत्रा पवार आणि शरद पवार यांचे काही खासदार यांच्यात चर्चा सुरू आहे. दुसरीकडे सुनेत्रा पवार यांनी संपर्कात असलेल्या खासदारांबाबत केंद्रीय गृहमंत्री तथा भाजपाचे नेते अमित शाहा यांच्याशी चर्चा केली आहे. या चर्चेवेळी खासदार पार्थ पवार हेदेखील उपस्थित होते, असे सांगितले जात आहे.
नेमके कोणते खासदार सुनेत्रा पवारांच्या संपर्कात?
लोकसभेच्या 2024 सालच्या निवडणुकीत शरद पवार यांच्या पक्षाला एकूण आठ जागांवर विजय मिळवता आला होता. म्हणजेच लोकसभेत शरद पवार यांचे एकूण आठ खासदार आहेत. तर याच निवडणुकीत अजित पवार यांना फक्त एकाच जागेवर विजय मिळवता आला होता. शरद पवार यांच्या एकूण 8 खासदारांपैकी काही खासदार हे सुनेत्रा पवार यांच्या संपर्कात असल्याचे बोलले जात आहे. परंतु हे खासदार नेमके किती आहेत? ते खासदार कोण आहेत? याची नेमकी माहिती समोर आलेली नाही. त्यामुळे आता भविष्यात नेमके काय घडणार? याकडे संपूर्ण राज्याचे लक्ष लागले आहे.
