Mercedes Benz S Class: बॅटरी अन् पेट्रोलवर धावणार लक्झरी कार, मर्सिडीज-बेंझची ‘एस-क्लास’ भारतात, फीचर्स, किंमत आणि संपूर्ण माहिती | ऑटो

एस 450 ई मध्ये 3.0 लिटर टर्बो-पेट्रोल इंजिन आणि इलेक्ट्रिक मोटरचा वापर करण्यात आला आहे. या दोन्हींच्या संयुक्त शक्तीमुळे कार 435 एचपी पॉवर आणि 680 एनएम टॉर्क निर्माण करते. त्यामुळे ही लक्झरी सेडान वेगवान आणि प्रभावी कामगिरी करण्यास सक्षम ठरते. कार अवघ्या 5.7 सेकंदांत 0 ते 100 किमी प्रतितास वेग गाठते, तर तिचा कमाल वेग 250 किमी प्रतितास आहे.

या कारमध्ये 22 kWh क्षमतेची लिथियम-आयन बॅटरी देण्यात आली असून ती पूर्ण चार्ज केल्यावर सुमारे 115 किलोमीटरपर्यंत केवळ इलेक्ट्रिक मोडमध्ये धावू शकते. त्यामुळे शहरातील दैनंदिन प्रवासासाठी पेट्रोलचा वापर मोठ्या प्रमाणात कमी होतो. गरजेनुसार पेट्रोल इंजिन आणि इलेक्ट्रिक मोटर आपोआप कार्यरत होत असल्याने प्रवास अधिक सहज आणि आरामदायी बनतो.

नव्या एस-क्लासमध्ये डिजिटल हेडलॅम्प्स, आकर्षक फ्रंट ग्रिल, नव्या डिझाइनचे टेललॅम्प्स आणि एमबीयूएक्स सुपरस्क्रीनसारखी आधुनिक फीचर्स देण्यात आली आहेत. याशिवाय ‘हे मर्सिडीज’ व्हॉइस असिस्टंट आणि गूगल मॅप्स-आधारित नेव्हिगेशन सिस्टममुळे डिजिटल अनुभव अधिक स्मार्ट बनतो.

प्रवाशांच्या आरामासाठी एअर सस्पेन्शन, प्रशस्त केबिन आणि सामानासाठी पुरेशी बूटस्पेस देण्यात आली आहे. सुरक्षिततेसाठी प्रगत सुरक्षा तंत्रज्ञानासह 15 पर्यंत एअरबॅग्स उपलब्ध आहेत. विशेष म्हणजे भारतात या लक्झरी प्लग-इन हायब्रिड सेडानची किंमत 2.20 कोटी रुपयांपासून सुरू होत असून ती 2.38 कोटी रुपयांपर्यंत जाते.