एकीकडे देशभरात नीट पेपरफुटीवरून वाद सुरू असताना दुसरीकडे शिक्षण व्यवस्थेवर आधारित एक वेब सीरिज ओटीटी प्लॅटफॉर्मवर चर्चेत आली आहे. शिक्षण व्यवस्थेचं खरं रुप यात उघड करण्यात आलं आहे. अवघ्या पाच दिवसांपूर्वी ओटीटी प्लॅटफॉर्मवर प्रदर्शित झालेल्या या सीरिजने 'बर्लिन 2'सह इतर टॉप ट्रेंडिंगमधल्या सीरिजना मागे टाकलं आहे.
नेटफ्लिक्सच्या टॉप ट्रेंडिंग यादीत पहिल्या क्रमाकांवर असलेल्या या वेब सीरिजला आयएमडीबीकडूनही चांगली रेटिंग मिळाली आहे. विविध शाळांमधील बिघडलेली परिस्थिती आणि मंत्र्यांच्या मुलीसोबत घडलेल्या धक्कादायक घटनेच्या पार्श्वभूमीवर शिक्षण मंत्रालयाअंतर्गत एका संरक्षण ब्युरोची स्थापना करण्यात येते. या ब्युरोचा अधिकारी मर्यादा ओलांडणाऱ्या विद्यार्थ्यांना आणि त्यांच्या कुटुंबीयांना शिक्षा देतो.
शिक्षकांचा गमावलेला आदर, सन्मान परत मिळवून देण्यासाठी आणि शिक्षणव्यवस्था पुन्हा रुळावर आणण्यासाठी हा अधिकारी काय काय करतो, त्याची दमदार कथा या वेब सीरिजमध्ये पहायला मिळते. या वेब सीरिजचं नाव आहे 'टीच यू अ लेसन'. या एक कोरियन ड्रामा असून यामध्ये किम मू येओल, ली संग मिन, जिन की जू आणि प्यो जी हून यांनी मुख्य भूमिका साकारल्या आहेत.
ही वेब सीरिज 5 जून रोजी नेटफ्लिक्स या ओटीटी प्लॅटफॉर्मवर प्रदर्शित झाली असून लगेचच ती टॉप 10 ट्रेंडिंग यादीत पहिल्या क्रमाकांवर पोहोचली आहे. या सीरिजने 'द वंडरफुल्स' आणि 'बर्लिन 2'सारख्या सीरिजना मागे टाकलं आहे. आयएमडीबीवर याला दहापैकी 8.5 अशी उत्तम रेटिंग मिळाली आहे.
ओटीटीवर रोमँटिक, रोमँटिक कॉमेडी सीरिज पाहून कंटाळला असाल तर हा अॅक्शन ड्रामा तुमच्यासाठी परफेक्ट आहे. या सीरिजचा प्रत्येक एपिसोड तुम्हाला खिळवून ठेवतो आणि पुढच्या भागामध्ये काय होईल, याची उत्सुकता ताणून ठेवतो.
