Omraje Nimbalkar : उद्धव ठाकरे यांच्या पक्षातील सहा खासदार फुटले आहेत. यात धाराशिवचे खासदार ओमराजे निंबाळकर यांचेदेखील नाव आहे. परंतु वडिलांच्या हत्येचा निकाल विरोधात गेल्यानंतर ओमराजे निंबाळकर यांनी मी माझ्या पक्षातील कार्यकर्त्यांशी चर्चा करून शिंदे गटात सामील व्हायचे की नाही, हे ठरवणार आहे, अशी भूमिका घेतली आहे. त्यानंतर आता संपूर्ण महाराष्ट्राचे लक्ष ओमराजे यांच्या भूमिकेकडे लागले आहे. ओमराजे यांना पक्षात सामील करून घेण्याची तसेच ओमराजेंचे मन वळवण्याची जबाबादारी आमदार तानाजी सावंत यांच्यावर सोपवलेली आहे. ते सध्या धाराशिवमध्ये आहेत. दरम्यान, इकडे मुंबईत उपमुख्यमंत्री एकनाथ शिंदे यांनी ऑपरेशन टायगर आणि ओमराजे यांच्या पक्षप्रवेशावर सर्वात मोठं विधान केलं आहे. त्यांच्या सूचक विधानानंतर आता ओमराजे लवकरच शिंदे गटात प्रवेश करणार, असे म्हटले जात आहे.
शिवीगाळ करणं, आरोप करणं चुकीचं आहे
पावसाळी अधिवेशनाच्या पूर्वसंध्येला मुख्यमंत्री देवेंद्र फडणवीस यांनी दोन्ही उपमुख्यमंत्र्यांनी पत्रकार परिषद घेतली. यावेळी एकनाथ शिंदे यांनी माध्यम प्रतिनिधींशी संवाद साधला आणि काही प्रश्नांची उत्तरं दिली. यावेळी बोलताना त्यांनी ओमराजे यांच्या पक्षप्रवेशावर भाष्य केले. काल पवनराजे निंबाळकर यांच्या हत्येचा खटला कोर्टात निर्णयासाठी होता. त्यांचं कुटुंब वेगळ्या दुखात होतं. अशा संवेदनशील परिस्थितीत त्यांना शिवीगाळ करणं, आरोप करणं चुकीचं आहे, असे मत यावेळी एकनाथ शिंदे यांनी व्यक्त केलं.
थांबा ब्रेकिंग न्यूज मिळेल
तसेच, ते ठाकरे गटात होते तेव्हा त्यांना जमिनीवरचा कार्यकर्ता म्हटलं जात होतं. आता त्यांच्यावर आरोप केले जात आहेत. त्यांना रिलस्टार म्हटलं जात आहे, अशी टीका शिंदे यांनी केली. तसेच सकाळी आरोप करतात, खासदारांना शिव्या देतात, रात्री गुपचूप जाऊन त्यांचे पाय धरतात. हा खरा म्हणजे केमिल लोचा आहे, अशी टीका त्यांनी ठाकरे गटावर केली. तसेच जी काही चर्चा सुरू आहे, ती खोटी आहे. आम्ही कोणतंही ऑपरेशन अर्धवट करत नाही. तुम्हाला थोडं थांबा ब्रेकिंग न्यूज मिळेल, असं सूचक विधानही त्यांनी केलं.
