वयाच्या अवघ्या 15 व्या वर्षी आपल्या वादळी फलंदाजीने भल्याभल्या गोलंदाजांना घाम फोडणारा वैभव सूर्यवंशी सध्या भारताच्या टी 20 संघात जागा मिळवण्यासाठी संघर्ष करत आहे. नुकत्याच झालेल्या अफगाणिस्तानविरुद्धच्या टी 20 मालिकेत वैभवला फक्त बेंचवरच बसावे लागले. अभिषेक शर्मा आणि संजू सॅमसन ज्या भन्नाट फॉर्ममध्ये फलंदाजी करत आहेत, ते पाहता वैभवचे टीम इंडियात पुनरागमन कठीण आहे असे म्हटले तर वावगे ठरणार नाही. पण भारताचा माजी क्रिकेटपटू मोहम्मद कैफ याचे यावर थोडे वेगळे मत आहे. कैफने या धडाकेबाज फलंदाजाबाबत एक मोठा अंदाज वर्तवला आहे.
मोहम्मद कैफने असा दावा केला आहे की वैभव सूर्यवंशी येत्या 6 महिन्यांत भारताच्या टी 20 संघात आपली पक्की जागा निर्माण करू शकतो. तिलक वर्मा किंवा शिवम दुबे यांच्या जागी वैभवला अंतिम अकरामध्ये संधी मिळू शकते आणि तो टी 20 संघात तिसऱ्या क्रमांकावर फलंदाजीला येऊ शकतो असेही कैफने स्पष्ट केले.
आपल्या यूट्यूब चॅनेलवर बोलताना कैफने सांगितले की तिलक वर्मा जरी उपकर्णधार असला तरी यापूर्वी उपकर्णधारांनाही संघातून डच्चू देण्यात आला आहे. दुसरीकडे शिवम दुबेही सातत्याने चांगली कामगिरी करत नाहीये. त्याचे क्षेत्ररक्षणही फारसे चांगले नसून तो पूर्णपणे अष्टपैलू खेळाडूही नाही कारण त्याच्याकडून फारशी गोलंदाजी करून घेतली जात नाही. तो सध्या फक्त एक फलंदाज म्हणूनच खेळत आहे. त्यामुळे येत्या 6 महिन्यांत तिलक किंवा दुबे यापैकी एकाला संघातून बाहेरचा रस्ता दाखवला जाईल आणि मग वैभव सूर्यवंशीला नक्कीच संधी मिळेल असा ठाम विश्वास कैफने व्यक्त केला.
कैफने यावेळी वैभवच्या गोलंदाजीचेही विशेष कौतुक केले. दुलीप करंडक स्पर्धेत वैभवने धावा तर केल्याच पण सोबतच तो गोलंदाजी करतानाही दिसल्याचे कैफने निदर्शनास आणून दिले. यामुळे सर्वांना त्याच्यातील एका वेगळ्याच पैलूची ओळख झाली. जर आपण काही षटके गोलंदाजी करू शकलो तर संघासाठी आपण आणखी उपयुक्त ठरू हे आता वैभवलाही चांगलेच समजले असल्याचे कैफने शेवटी सांगितले.
