1980 आणि 90 च्या काळात अंडरवर्ल्डकडून बॉलिवूडमध्ये खूपच दखल दिली जात होती. अंडरवर्ल्डमधील अनेल कोलं बॉलिवूडच्या फिल्म्सवर पैसे लावायचे. अनेक मोठ-मोठ्या स्टार्सना अंडरवर्ल्डकडून धमक्या मिळायच्या. अशाच स्टार्सपैकी एक होता बॉलिवूडचा बादशाह म्हणजेच शाहरुख खान (Shah Rukh Khan ). इतरांप्रमाणेच त्यालाही धमकी मिळाली होती. मात्र अशी धमकी मिळाल्यावरही शाहरूख बिलकूल घाबरला नाही त्याने अंडरवर्ल्डसमोर झुकण्यास, त्यांच्यासमोर गुडघे टेकण्यास नकार दिला. पाहिजे तर मला गोळी मारा, असं उलट त्याने सुनावलं होतं.
शाहरुखलाही मिळाली धमकी
‘हुसैन जैदी फाइल्स’ पॉडकास्टदरम्यान दिग्दर्शक संजय गुप्ताने या गोष्टीचा खुलासा केला. शाहरुख हा बॉलिवूडमधील असा एकमेव माणूस होता, जो अंडरवर्ल्डला घाबरला नाही, ना त्याच्यावर धमक्यांचा परिणाम झाला. ‘काहीही झालं तरी मी तुमचा चित्रपट करणार नाही’, असंच त्याने माफियांना सुनावलं होतं, असं गुप्ता यांनी सांगितलं.
बिलकूल घाबरला नाही किंग खान
संजय गुप्ता यांनी सांगितलं की, जेव्हा शाहरुखला धमकी मिळाली तेव्हा तो म्हणाला होता मी कधीच तुमचा पिक्चर किंवा शो करणार नाही… मी पठाण आहे. पाहिजे तर मला गोळी घाला. मी तुम्हाला घाबरत नाही, तुमच्यासोबत कधीच काम करणार नाही ना कोमताही शो करेन. खरंतर त्याने त्या लोकांचा आदर मिळवला. कमीत कमी अशी एक तरी व्यक्ती आहे जो धमक्यांना घाबरत नाही, असं त्यांना वाटलं असेल, असं गुप्ता म्हणाले. मात्र या घटनेनंतर सतत तीन वर्ष शाहरुखसोबत पोलिसाची कडेकोट सुरक्षा होती.
डुप्लीकेटच्या वेळेस होता जीवाला धोका
फिल्म क्रिटीक अनुपमा चोप्रा यांनीही किंग ऑफ बॉलीवुड: शाहरुख खान या त्यांच्या पुस्तकात याचा उल्लेख केला होता. शाहरुख खान जेव्हा मेहश भट्ट यांच्या डुप्लीकेट सिनेमात काम करत होता, तेव्हा पोलिसांनी महेश भट्ट यांना इशारा दिला होता की शाहरुखच्या जीवाला धोका आहे. त्यानंतर त्यांच्यासाठी पर्सनल बॉडीगार्डची नेमणूक करण्यात आली होती.
अबू सलेमचा जेव्हा फोन आला…
या पुस्तकात आणखीही एका घटनेचाही उल्लेख आहे, जेव्हा अबू सालेमने शाहरुखला कॉल केला होता. त्याच्या जवळच्या प्रोड्युसरसोबत काम करण्यास शाहरुखने नकार दिल्याने, त्या गँगस्टरने कथितरित्याशाहरुखला फोन करून शिव्या दिल्या होत्या. मात्र त्यावेळी शाहरुखने अतिशय सांभाळून संवाद साधला होता. मात्र चित्रपट करण्यासाठी सालेमने शाहरुखवर दबाव टाकला होता. तेव्हा त्याने त्यालाच ऐकवलं. कोणाला मारायचं हे मी तुला सांगत नाही ना, मग कोणता चित्रपट करायचा हे तू मला नको शिकवू, अशा शब्दांत त्याने सालेमला सुनावल्याचं सागितलं जातं.
