Railway New Rule: रेल्वेने नियम बदलला, प्रवास सुरू करण्यापूर्वी 10 वेळा तिकीट तपासा; एक चूक पडणार दुप्पट महागात | बिझनेस

यापूर्वी विनातिकीट पकडलेल्या प्रवाशांकडून किमान 250 रुपयांचा अतिरिक्त दंड आकारला जात होता. मात्र आता हा दंड वाढवून किमान 500 रुपये करण्यात आला आहे. हा नियम केवळ पूर्णपणे विनातिकीट प्रवास करणाऱ्या प्रवाशांपुरता मर्यादित नाही. चुकीचे तिकीट, आधीच वापरलेले तिकीट किंवा अवैध तिकीट घेऊन प्रवास करणाऱ्यांनाही याच श्रेणीत गणले जाईल. अशा परिस्थितीत संबंधित प्रवाशांकडून प्रवासाचे पूर्ण भाडे आणि अतिरिक्त दंड वसूल केला जाईल.

रेल्वे प्रशासनाने स्पष्ट केले आहे की ही कारवाई रेल्वे अधिनियम 1989 मधील कलम 137 आणि 138 अंतर्गत केली जाईल. या तरतुदींचा उद्देश जाणीवपूर्वक तिकीट न घेता किंवा चुकीच्या पद्धतीने प्रवास करून भाडे टाळणाऱ्या प्रवाशांवर नियंत्रण ठेवणे हा आहे. तिकीट तपासणीदरम्यान नियमांचे उल्लंघन झाल्याचे सिद्ध झाल्यास संबंधित प्रवाशाविरोधात कायदेशीर कारवाईही सुरू केली जाऊ शकते.

रेल्वेने स्पष्ट केले आहे की जर एखाद्या प्रवाशाने दंड आणि थकित भाडे भरण्यास नकार दिला तर प्रकरण न्यायालयात जाऊ शकते. अशा परिस्थितीत कायदेशीर प्रक्रियेनुसार दोषी ठरलेल्या व्यक्तीला सहा महिन्यांपर्यंत कारावासाची शिक्षा होऊ शकते. ही तरतूद यापूर्वीपासून अस्तित्वात आहे. मात्र आता तिची अंमलबजावणी अधिक कठोरपणे केली जाणार आहे, असे रेल्वे अधिकाऱ्यांनी सांगितले.

रेल्वेच्या आकडेवारीनुसार देशभरात अजूनही मोठ्या प्रमाणावर विनातिकीट प्रवासाच्या घटना समोर येत आहेत. केवळ मे महिन्यात राबविण्यात आलेल्या विशेष तिकीट तपासणी मोहिमेदरम्यान लाखो प्रवासी वैध तिकीटाशिवाय प्रवास करताना आढळले. या प्रवाशांकडून वसूल करण्यात आलेल्या भाडे आणि दंडाच्या स्वरूपात रेल्वेला कोट्यवधी रुपयांचे उत्पन्न मिळाले आहे. यावरून विनातिकीट प्रवास ही रेल्वेसमोरील मोठी समस्या असल्याचे स्पष्ट होते.

रेल्वे प्रशासनाने प्रवाशांना प्रवास सुरू करण्यापूर्वी वैध तिकीट घेण्याचे आवाहन केले आहे. सध्या ऑनलाइन बुकिंग, मोबाईल ॲप्स, UTS ॲप तसेच रेल्वे आरक्षण केंद्रांमुळे तिकीट खरेदी करणे पूर्वीपेक्षा अधिक सोपे झाले आहे. त्यामुळे काही रुपये वाचवण्यासाठी नियमांचे उल्लंघन करणे आता महागात पडू शकते.