Pankaj Tripathi Brother Attack: बॉलिवूडचे प्रसिद्ध अभिनेते पंकज त्रिपाठी (Pankaj Tripathi) यांचे भाऊ बिजेंद्रनाथ तिवारी यांच्यावर बिहारमध्ये धारदार शस्त्रांनी हल्ला करण्यात आला असून त्यात ते गंभीर जखमी झाले आहेत. सध्या त्यांच्यावर पटणा येथील रुग्णालयात उपचार सुरू आहेत. मिळालेल्या माहितीनुसार, जुन्या वैमनस्यातून हा हल्ला झाल्याचं समोर आलं आहे. IANS ने रुग्णालयात पोहोचतानाचा व्हिडिओ शेअर करत सांगितलं की, बिजेंद्रनाथ तिवारी यांना गंभीर जखमा झाल्यानंतर त्यांना उपचारांसाठी पाटण्याला हलवण्यात आलं.
नेमका कसा झाला हल्ला?
हा हल्ला बिहारमधील बेलसंड गावात, माधोपुर पोलीस ठाण्याच्या हद्दीत घडल्याचं सांगितलं जात आहे. मिळालेल्या वृत्तानुसार, जुन्या वादातून हल्लेखोरांनी त्यांना लक्ष्य केलं. गावात दबा धरून बसलेल्या आरोपींनी अचानक त्यांच्यावर धारदार शस्त्रांनी हल्ला केला. या हल्ल्यात बिजेंद्रनाथ गंभीर जखमी झाले. त्यानंतर कुटुंबीयांनी त्यांना तातडीने रुग्णालयात दाखल केलं. प्राथमिक उपचारांदरम्यान डॉक्टरांनी त्यांची प्रकृती अत्यंत गंभीर असल्याचं सांगितलं. यानंतर वैद्यकीय पथकाने त्यांना पुढील उपचारांसाठी पटणा येथे रेफर केलं. सध्या तज्ज्ञ डॉक्टरांच्या देखरेखीखाली त्यांच्यावर उपचार सुरू आहेत. त्यांची प्रकृती आता स्थिर असून, या हल्ल्यामागील आरोपींचा शोध घेण्यासाठी पोलिसांनी विशेष पथक तयार करून छापेमारी सुरू केली आहे. पोलिसांच्या प्राथमिक अंदाजानुसार, हा हल्ला शेजाऱ्यामधील जमिनीच्या वादातून उद्भवल्याचा अंदाज आहे. या प्रकाणी एका आरोपीला अटक झाल्याचेही समेर येत आहे.
तपासाच्या अनुषंगाने पोलिसांकडून साक्षीदार तसेच परिसरातील रहिवाशांचे जबाब नोंदवले जात आहेत.प्रकरणाची गंभीरता लक्षात घेऊन घटनास्थळाची बारकाईने तपासणी आणि महत्त्वाचे पुरावे गोळा करण्यासाठी न्यायवैद्यक विज्ञान प्रयोगशाळेच्या (एफएसएल) पथकालाही घटनास्थळी बोलावण्यात आले आहे.
Arjun Tendulkar Weds Saaniya Chandhok : अर्जुन-सानिया लग्नबंधनात ! स्टायलिश लूकने वेधलं लक्ष
