श्रेयस अय्यरच्या रूपाने भारतीय क्रिकेट संघ एका नव्या टी-20 प्रवासाला सुरुवात करत आहे. आजपासून सुरू होणाऱ्या आयर्लंडविरुद्धच्या दोन सामन्यांच्या टी-20 मालिकेबद्दल संपूर्ण देश उत्सुक आहे. याचे कारण आहे वैभव सूर्यवंशी! या मालिकेत खेळून तो इतिहास रचू शकतो, कारण सध्या भारतासाठी सर्वात कमी वयात आंतरराष्ट्रीय पदार्पण करण्याचा विक्रम सचिन तेंडुलकरच्या नावावर आहे. वैभव हा विक्रम मोडू शकतो.वैभवकडे सर्वांचे लक्ष असणार आहे मात्र, या मालिकेत तो एकटाच खेळाडू नाही; आणखी दोन खेळाडू टी-20 मध्ये पदार्पण करू शकतात. भारत आणि आयर्लंड यांच्यात दोन टी-20 सामने खेळले जातील. पहिला सामना शुक्रवार, 26 जून रोजी आणि दुसरा 28 जून रोजी खेळला जाईल. दोन्ही सामने भारतीय प्रमाणवेळेनुसार संध्याकाळी 6 वाजता सुरू होतील. वैभव सूर्यवंशीचा भारत ‘अ’ संघासाठी शेवटचा सामना श्रीलंका ‘अ’ संघाविरुद्धच्या त्रिकोणीय मालिकेचा अंतिम सामना होता, ज्यात त्याने 11 चेंडूंमध्ये विक्रमी अर्धशतक झळकावले होते. तो उत्कृष्ट फॉर्ममध्ये आहे आणि चाहते त्याचा हा फॉर्म आंतरराष्ट्रीय क्रिकेटमध्ये पाहण्यासाठी उत्सुक आहेत.
भारताकडे अभिषेक शर्मा, संजू सॅमसन आणि ईशान किशन यांच्या रूपात तीन अव्वल दर्जाचे सलामीवीर आहेत, जे सर्वजण बऱ्याच काळापासून खेळत आहेत. श्रेयस अय्यरसमोर वैभव सूर्यवंशीची जागा कोणाला द्यायची हा पेचप्रसंग उभा राहील. वैभवची कामगिरी पाहता, त्याला बदलण्यावर कोणतीही टीका होणार नाही. वैभवने आयपीएल 2026 मध्ये ऑरेंज कॅप, MVP आणि सर्वाधिक षटकारांचे पुरस्कार जिंकले आहेत.
वैभव सूर्यवंशी व्यतिरिक्त, वेगवान गोलंदाज प्रिन्स यादव या मालिकेत टी-20 आंतरराष्ट्रीय पदार्पण करू शकतो. त्याने अफगाणिस्तानविरुद्ध एकदिवसीय पदार्पण आधीच केले आहे. गोलंदाजी प्रशिक्षकाने प्रिन्सबद्दल सांगितले की, “तो संघात चांगलाच रुळला आहे आणि राष्ट्रीय संघासोबतचा हा त्याचा पहिलाच सराव आहे असे वाटले नाही.” प्रिन्स यादवने आयपीएल 2026 मध्ये लखनौसाठी पॉवरप्लेमध्ये फलंदाजांना अडचणीत आणत शानदार कामगिरी केली. त्याने 14 सामन्यांमध्ये 16 बळी घेतले.
श्रेयस अय्यरचा लाडका खेळाडू करणार पदार्पण
सूर्यांश शेडगे आयर्लंडविरुद्धच्या टी-20 मालिकेत पदार्पण करू शकतो. दुखापतीमुळे बाहेर झालेल्या नितीश कुमार रेड्डीच्या जागी या 23 वर्षीय अष्टपैलू खेळाडूचा संघात समावेश करण्यात आला आहे. त्याच्या अलीकडील फॉर्ममुळे निवड समितीने त्याला बदली खेळाडू म्हणून निवडले आहे. त्याने श्रीलंकेतील त्रिकोणीय मालिकेत भारत ‘अ’ संघासाठी फलंदाजी आणि गोलंदाजी दोन्हीमध्ये चांगली कामगिरी केली होती. श्रेयस अय्यर आणि सूर्यांश शेडगे दोघेही मुंबईकडून खेळतात आणि आयपीएलमध्ये पण ते पंजाब किंग्जकडून खेळतात. श्रेयस सूर्यांशला खूप वर्षांपासून ओळखतो आणि त्याला त्याचा खेळ पण माहित आहे.
