Health Alert : रात्री पुरेशी झोप होत नसेल तर सावधान, थेट हृदयावर होऊ शकतो परिणाम; काय काळजी घ्याल?

मुंबई : आजकालची बदलती जीवनशैली, उशिरापर्यंत मोबाईलचा वापर, ऑफिसच्या कामाचा ताण आणि अभ्यासाचा दबाव यामुळे अनेक लोकांची झोप अपुरी राहत आहे. रोज केवळ 5 ते 6 तास झोपून अनेक लोक त्याला सामान्य मानतात आणि वीकेंडला ही झोप भरून काढू असा विचार करतात. मात्र, झोप ही केवळ शरीराला विश्रांती देण्याचे माध्यम नाही. झोपेत असताना आपले शरीर अनेक महत्त्वाची कामे करत असते आणि हृदयालाही विश्रांती मिळते. अमेरिकन हार्ट असोसिएशनच्या (AHA) मते, अपुरी आणि अस्वस्थ झोप थेट हृदयाचे आरोग्य, रक्तदाब आणि मेटाबॉलिझमवर गंभीर परिणाम करते.

How Many Hours Sleep Required : रोज किती तास झोप आवश्यक आहे?

तज्ज्ञांच्या मते, प्रत्येक प्रौढ व्यक्तीला दररोज रात्री किमान 7 तासांची गाढ झोप मिळणे अत्यंत आवश्यक आहे. एखाद्या दिवशी कमी झोपणे वेगळे, पण रोजच 7 तासांपेक्षा कमी झोपण्याची सवय झाल्यास शरीरात अनेक गंभीर आजार घर करू लागतात. केवळ तासांची गणना करण्यापेक्षा झोपेची गुणवत्ता (Sleep Quality) आणि दिवसभरात शरीराला कसे वाटते, यावर लक्ष देणे गरजेचे आहे.

Effect On Blood Pressure : अपुऱ्या झोपेचा रक्तदाबावर कसा होतो परिणाम?

आपण जेव्हा गाढ झोपेत असतो, तेव्हा नैसर्गिकरीत्या आपला रक्तदाब (Blood Pressure) कमी होतो, ज्यामुळे हृदय आणि रक्तवाहिन्यांना विश्रांती मिळते. परंतु जर झोप अपुरी असेल किंवा रात्री वारंवार मोडत असेल, तर रक्तदाब कमी होण्याची ही प्रक्रिया विस्कळीत होते. दीर्घकाळ अपुरी झोप राहिल्याने हाय ब्लड प्रेशरचा (High BP) त्रास सुरू होतो. हाच उच्च रक्तदाब पुढे जाऊन हृदयविकाराचा झटका (Heart Attack) आणि स्ट्रोकचा (Stroke) धोका अनेक पटींनी वाढवतो.

Sleep Quality Matters : केवळ तास नाही, झोपेची गुणवत्ताही महत्त्वाची

7 ते 8 तास अंथरुणावर पडून राहणे म्हणजे उत्तम झोप असा होत नाही. जर तुम्हाला खालील लक्षणे जाणवत असतील, तर तुमच्या झोपेची गुणवत्ता खराब आहे:

रात्री वारंवार जाग येणे.

झोप लागण्यासाठी खूप वेळ लागणे.

सकाळी उठल्यानंतरही थकवा आणि आळस जाणवणे.

Sleep Apnea and Snoring : घोरणे आणि श्वास गुदमरणे हे धोक्याचे संकेत

जर एखाद्या व्यक्तीला खूप मोठ्याने घोरण्याची सवय असेल, रात्री अचानक श्वास रोखल्यासारखा वाटून जाग येत असेल, तर हे स्लीप अॅप्निया (Sleep Apnea) चे लक्षण असू शकते.

स्लीप अॅप्नियामध्ये झोपेत श्वासनलिका वारंवार बंद होते, ज्यामुळे शरीराला मिळणारा ऑक्सिजनचा पुरवठा कमी होतो. या समस्येमुळे हाय बीपी, हार्ट अटॅक आणि स्ट्रोकचा धोका खूप जास्त वाढतो. अशी लक्षणे दिसल्यास त्वरित डॉक्टरांचा सल्ला घ्यावा.