छोट्या पडद्यावर अशा अनेक मालिका आहेत ज्या पाहण्यासाठी प्रेक्षक वेळात वेळ काढतात. काही मालिका तर अशा आहेत ज्या वर्षानुवर्षे चालत आहेत तरी देखील प्रेक्षक तितक्याच आवडीने त्या पाहात असतात. आता अशीच एक मालिका पुन्हा एका प्रेक्षकांच्या भेटीला येणार आहे. या मालिकेत आदेश बांदेकर मुख्य भूमिकेत दिसणार आहेत. आता ही मालिका कोणती असा प्रश्न तुम्हाला पडला असेल. जाणून घ्या…
आता संध्याकाळी गरमागरम चहा, कुरकुरीत भजी, हातात रिमोट आणि टीव्हीच्या पडद्यावर पुन्हा एकदा प्रेक्षकांचा सर्वात लाडका कार्यक्रम पाहायला मिळणार आहे. आम्ही बोलत आहेत, महाराष्ट्राच्या घराघरांत प्रेम मिळवलेला आणि दोन दशकांहून अधिक काळ प्रेक्षकांचे मनोरंजन करणारा ‘होम मिनिस्टर’ या कार्यक्रमाविषीय.
‘होम मिनिस्टर’ पुन्हा नव्या पर्वासह भेटीला येत आहे. पुन्हा एकदा महाराष्ट्राच्या घराघरांत घुमणार 'दार उघड बये, दार उघड…! चा आवाज. आदेश बांदेकर म्हणजेच “भाऊजी पैठणी घेऊन आले…”
असंख्य कुटुंबांच्या सुख-दुःखात सहभागी झालेले ‘भाऊजी’ आता पुन्हा एकदा वहिनींच्या भेटीस येणार आहेत. नुकत्याच प्रदर्शित झालेला प्रोमो पाहून प्रेक्षकांमध्ये उत्सुकता शिगेला पोहोचली आहे.
‘होम मिनिस्टर’ हा कार्यक्रम कधी सुरु होणार याबाबत अद्याप माहिती समोर आलेली नाही. पण चाहत्यांमधील उत्सुकता पाहण्यासारखी आहे.
