Deool Band 2 : मराठी चित्रपटसृष्टीत सध्या ‘देऊळ बंद 2’ या चित्रपटाची जोरदार चर्चा सुरू आहे. प्रेक्षकांकडून मिळत असलेल्या भरभरून प्रतिसादामुळे हा चित्रपट बॉक्स ऑफिसवर दमदार कमाई करत असून, 2026 मधील सर्वाधिक नफा कमावणारा मराठी चित्रपट ठरला आहे. मोहन जोशी, महेश मांजरेकर आणि प्रवीण तरडे यांसारख्या दिग्गज कलाकारांच्या अभिनयाने सजलेल्या या चित्रपटाने प्रदर्शित झाल्यापासून प्रेक्षकांना अक्षरशः थिएटरकडे खेचून आणले आहे.
अवघ्या 10 कोटी रुपयांच्या बजेटमध्ये तयार झालेल्या ‘देऊळ बंद 2’ने बॉक्स ऑफिसवर जबरदस्त यश मिळवले आहे. चित्रपटाने भारतात 68.72 कोटी रुपयांचे नेट कलेक्शन केले असून, त्याचे ग्रॉस कलेक्शन 81.08 कोटी रुपये इतके झाले आहे. विशेष म्हणजे चित्रपटाचा रिटर्न ऑन इन्व्हेस्टमेंट 58.72 कोटी रुपये असून, त्याची टक्केवारी तब्बल 587.2 टक्के इतकी आहे. या शानदार कमाईमुळे चित्रपटाला ‘सुपरहिट’ असा दर्जा मिळाला आहे. तसेच 2026 मधील सर्वाधिक नफा देणाऱ्या मराठी चित्रपटांच्या यादीत त्याने पहिला क्रमांक पटकावला आहे.
‘क्रांतीज्योती विद्यालय’ला मागे टाकले
यापूर्वी सर्वाधिक नफा कमावणाऱ्या मराठी चित्रपटाचा मान ‘क्रांतीज्योती विद्यालय’ या चित्रपटाकडे होता. हा चित्रपट 4 कोटी रुपयांच्या बजेटमध्ये तयार झाला होता आणि त्याने 27.35 कोटी रुपयांची कमाई करत 583.75 टक्के नफा मिळवला होता. मात्र, ‘देऊळ बंद 2’ ने 587.2 टक्के ROI मिळवत हा विक्रम मोडला असून, ‘क्रांतीज्योती विद्यालय’ आता दुसऱ्या क्रमांकावर आहे.
26व्या दिवशी किती झाली कमाई?
प्रदर्शनानंतर जवळपास चार आठवडे उलटूनही ‘देऊळ बंद 2’ची कमाई सुरूच आहे. चित्रपटाने 26व्या दिवशी 50 लाख रुपयांचा व्यवसाय केला. मात्र, 25व्या दिवसाच्या तुलनेत कमाईत 60.62 टक्क्यांची घसरण दिसून आली. 25व्या दिवशी चित्रपटाने 1.27 कोटी रुपयांची कमाई केली होती तर त्यानंतरच्या दिवशी कलेक्शन 50 लाखांवर आले.
या आकडेवारीवरून चित्रपटाला प्रदर्शित झाल्यानंतरही सातत्याने प्रेक्षकांचा प्रतिसाद मिळत असल्याचे दिसून येते. हा चित्रपट 2015 मध्ये आलेल्या ‘देऊळ बंद’ या गाजलेल्या चित्रपटाचा सिक्वेल आहे. पहिल्या भागालाही प्रेक्षकांनी मोठ्या प्रमाणात पसंती दिली होती आणि तो देखील बॉक्स ऑफिसवर यशस्वी ठरला होता. आता ‘देऊळ बंद 2’ने त्या यशाची पुनरावृत्ती करत नवा विक्रम आपल्या नावावर केला आहे.
